Хамас со задоцнување соопшти кои заложници ќе бидат ослободени утре

Хамас соопшти кои тројца заложници ќе бидат ослободени утре, со еден час задоцнување од крајниот рок во 16 часот.

Кабинетот на израелскиот премиер и Форумот за фамилии на заложници потврдија дека заложниците што треба да бидат ослободени се Охад Бен Ами (56), Ели Шараби (52) и Ор Леви (34).

„Тајмс оф Израел“ јави дека се уште не е јасно во кое време утре заложниците ќе бидат ослободени.

Шараби бил киднапиран од кибуцот Беери кога припадниците на Хамас извршија напад во јужен Израел на 7 октомври 2023 година. Тој и неговиот брат Јоси беа заробени. Оттогаш беше потврдена смртта на Јоси, а Хамас се уште го држи неговото тело.

Леви (34) бил киднапиран од фестивалот Супернова во близина на кибуцот Реим на 7 октомври. Во изминатите 16 месеци му било кажано дека татко му е исчезнат и се трага по него.