Естонија бара од ЕУ замрзнатите руски средства да се искористат за Украина

Естонија побара Европската Унија да дозволи користење на замрзнатите руски активи за поддршка на Украина. Балтичката земја го отфрли предлогот на Русија средствата да бидат искористени во рамките на мировен договор.

Естонија поднесе официјално барање за ова прашање до партнерите во ЕУ и ќе го покрене на утрешниот состанок на министрите за надворешни работи во Брисел, кој ќе се одржи на третата годишнина од руската инвазија.

Во рамките на санкциите против Москва, во ЕУ се замрзнати околу 210 милијарди евра руски средства.

Минатата година групата Г-7, заедно со ЕУ, се согласи да ги користи приходите од овие средства за финансирање на заем за Украина во износ од 50 милијарди долари, но самите активи останаа недопрени.

Одлуката за користење на приходите беше чекор во вистинска насока. Сега е време за следниот чекор, изјави естонскиот министер за надворешни работи, Маргус Цахкна.

Русија сугерираше дел од замрзнатите средства да бидат искористени за териториите под нејзина контрола, но Естонија го отфрли тој предлог, нагласувајќи дека тоа би значело прифаќање на руската окупација.