Македонски
Сопственик на продавница за миленици во Осака е уапсен под сомнение дека без потребните дозволи чувал соленоводен крокодил долг околу 1,5 метри и повеќе опасни желки, соопшти јапонската полиција.
Станува збор за 34-годишниот Сома Сатоми, сопственик на продавница во областа Хигашијодогава. Тој е осомничен за прекршување на законите за заштита и управување со животните и за инвазивни туѓи видови.
Полицијата на 1 септември извршила претрес во продавницата, по добиена информација од полициска управа од друга префектура. Во аквариум во задниот дел од објектот, каде што немале пристап купувачите, бил пронајден соленоводниот крокодил.
Покрај него, без дозвола биле чувани и една алигаторска желка, долга околу 70 сантиметри, како и 21 кајманска желка, вид што во Јапонија е класифициран како инвазивен. Според јапонските медиуми, во објектот биле пронајдени вкупно 25 животни.
Сатоми ја признал сомнителната активност и на полицијата ѝ кажал дека знаел оти животните ги чува незаконски. Според неговиот исказ, тие не биле наменети за продажба, туку ги чувал како миленици.
Соленоводниот крокодил е еден од најголемите видови крокодили во светот. Единката пронајдена во продавницата била долга околу 1,5 метри, но возрасните единки можат да достигнат должина од четири до пет метри. Видот може да нападне човек, а во неговата исхрана влегуваат и цицачи.
Полицијата сега истражува како Сатоми дошол до животните и дали тие биле незаконски внесени во Јапонија. Не се исклучува можноста дел од нив да биле прошверцувани.
