Skip to main content

Ни требаат околу 300 нови училници за сите училишта да работат само во прва смена, вели министерката за образование Јаневска

Министерство за образование и наука / Јаневска: 150 училишта во земјата имаат настава во една смена

Во државата има уште 245 училишта со двосменска настава и во моментов правиме анализа на условите, за да видиме попрецизно со какви и колкави инвестиции можеме да создадеме услови за едносменска настава. Некаде треба да се доградуваат училници, некаде може само да се преадаптираат простории, а некаде треба да се градат и целосно нови објекти. Сумирано според груби пресметки, ни требаат околу 300 нови училници“ изјави денеска министерката Весна Јаневска, која беше во Штип, во посета на подрачниот објект на основното училиште „Ванчо Прке“ во населеното место Ново Село.

За да се оствари процесот, Јаневска потенцираше дека се потребни средства и време, но изрази уверување дека во неколку календарски години целта ќе биде остварена.

Министерката Јаневска и градоначалникот на Штип, Иван Јорданов денеска го посетија подрачниот објект на основното училиште „Ванчо Прке“ каде локалната самоуправа со поддршка на министерството инвестира во подобрување на условите за настава и воведување на продолжен престој.

Јаневска кажа дека 150 училишта во земјата имаат настава во една смена, а интенцијата е тоа да го направат сите. Иако училиштата се под надлежност на општините, тие ќе ја имаат поддршката од Владата и од Министерството за образование и наука и во иднина.

Јаневска повторно ги спомена придобивките од едносменската настава.

Првенствено ќе ги задржиме децата повеќе на училиште, со оглед на тоа што имаат 900 часови помалку во споредба со европските врсници, повеќе ќе се социјализираат и значително ќе го подобрат своето знаење. Со едносменско работење се решава и предизвикот со вишокот наставници, кои остануваат да работат со учениците преку додатни активности“, рече Јаневска.

Нагласи дека важна придобивка од едносменското работење е и намалувањето на тековните трошоци на училишните објекти, а заштедените средства можат да се алоцираат за други корисни цели. Во ова, како што рече Јаневска, треба да придонесуваат и училишните раководства, наместо да ги злоупотребуваат ресурсите, посочувајќи го случајот со училишниот директор во Струмица кој дозволувал организирање на партиски состаноци во училниците во доцните часови, мислејќи дека тоа ќе остане незабележано.

Поврзани вести