Македонски
Во дел од медиумите денеска се појавија информации дека албанските власти наводно составиле „црна листа“ со повеќе од 60 државјани од Македонија, меѓу кои има функционери и јавни личности поврзани со коалицијата ВЛЕН. Сепак, досега нема официјална потврда од институциите во Албанија дека постои таква листа.
Според објавените информации, меѓу лицата кои наводно се наоѓаат на списокот се пратениците Аднан Азизи и Беким Ќоку, како и заменик-генералниот секретар на Владата, Хасим Муртезани, заедно со општински советници и други јавни личности.
Темата се отвори откако Беким Ќоку, Аднан Азизи и Хасим Муртезани соопштија дека им било оневозможено да влезат во Албанија. Според нив, причините за тоа не им биле образложени, а во дел од медиумските извештаи се наведува дека случајот може да биде поврзан со антивладините протести во Тирана.
Сепак, албанската Царинска управа ги демантираше овие тврдења. Во официјалната реакција се наведува дека тројцата функционери не биле спречени да влезат во земјата.
„Тие патуваа заедно со четврто лице, кое имаше проблеми со патната документација и поради тоа не можеше да му биде дозволен влез во Албанија. Другите тројца имаа право да ја преминат границата, но одлучија да не го продолжат своето патување и по своја слободна волја се вратија назад“, се наведува во реакцијата на албанските власти.
Во меѓувреме, во медиумите се појавија и информации дека забраната наводно е поврзана со нивна вмешаност во организирањето на антивладините протести во Тирана, познати како „Фламинго револуција“. Досега, сепак, нема официјална потврда од албанските власти која би го поврзала случајот со овие тврдења, ниту, пак, е потврдено постоењето на наводната „црна листа“.
