Во Задар се одржа првата промоција на колективната монографија „Македонска поетика и стилистика“ , следуваат промоции во Париз, Мадрид и Бања Лука

Деновиве во Задар, Хрватска се одржа првата промоција на колективната монографија „Македонска поетика и стилистика“ од авторите од Институтот за македонска литература и од Филолошкиот факултет „Блаже Конески“ во Скопје: Славчо Ковилоски, Весна Мојсова-Чепишевска, Иван Антоновски, Билјана Рајчинова-Николова, Славица Пет­ров­ска-Ѓорѓевска, Марина Цветаноска, Ема Лакинска, Трај­че Стамески и Бранко Тошовиќ. Монографијата е во издание на Комисијата за стилистика при Меѓународниот славистички комитет (Грац), а е во редакција на Славчо Ковилоски и Бранко Тошовиќ. На промоцијата се обратија двајцата редактори (Тошовиќ и Ковилоски, кој одржа и предавање за македонската книжевност) и Марина Цветаноска.

За македонската книжевност и култура воопшто, значајно е излагањето на редакторот и авторот Бранко Тошовиќ, професор на Универзитетот во Грац, кој потенцираше дека во серијата „Словенска стилистика“: „првиот авторски тим што успеа да го заврши овој потфат е маке­дон­ски, што со големо задоволство го посочувам. Во текот на една година ин­те­нзивна работа ги проучуваше и ги осмисли основните насоки на раз­во­јот на македонската книжевна метастилистика и метапоетика и ги презентира во публикацијата“.

Исто така, тој истакна дека „презентирањето и популаризацијата на македонски стилистички и пое­тички истражувања во светот, особено во словенскиот регион и поранешна Југославија ќе биде олеснето со фактот (1) дека оваа мо­нографија е објавена надвор од Македонија ‒ во Австрија, (2) дека е от­пе­чатена во научна серија на една од комисиите на Меѓународниот сла­вис­тич­ки комитет, (3) дека е опремена со резиме и содржина на англиски, на  германски и на руски јазик, со предметен индекс и индекс на имиња и со ли­тература по секоја статија и интегрална библиографија на крајот од ана­ли­тичкиот дел од книгата, (4) дека ќе биде претставена на научни собири во повеќе земји“.

Треба да се има предвид дека ова издание е прво од ваков вид во македонската литература. Овој пионерски потфат, во извесна ме­ра би можел да послужи и како своевидна историја на македонската кни­жев­ност, со оглед на тоа што во него е опфатена целокупната македонска литература, почнувајќи од раниот среден век па сѐ до денес.

Во текот на следниот период, најавени се промоциите на изданието во Париз, Мадрид и Бања Лука, а се работи на договори за промоции и во Загреб, Риека, Белград, Љубљана, Букурешт, Братислава и други македонистички и славистички центри. На почетокот на летото е планирано да се одржи и првата од неколкуте македонски промоции.