Македонски
Во градот каде што традицијата не е минато, туку јазик што се учи, се пренесува и се препознава, заврши едно од највпечатливите изданија на музичкиот камп „Етно Македонија“, со концерт што ја потврди моќта на фолклорот да живее и да поврзува.
Настанот, одржан на платото пред Офицерскиот дом во рамки на фестивалот „Илинденски денови“, ги обедини гласовите, инструментите и културните кодови на дваесет млади музичари од 11 земји, кои десет дена работеа и твореа заедно во Битола. Под менторство на Ангел Спироски и Андријана Такиќ, тие го споија традиционалното и современото, локалното и интернационалното, и покажаа дека етно музиката има иднина, кога ќе ѝ се даде можност да зборува со светот.
Кавалот се сретна со диџеридо. Македонската песна стана дует со глас од Финска. Танцувачите не беа само на сцената – публиката се фати за рака, го продолжи орото, и сите заедно ја создадоа онаа ретка магија кога уметноста станува заедничка енергија.
„Денес, за утре“ – слоганот на фестивалот станува реалност 
Годинава, 55. издание на „Илинденски денови“ ја слави традицијата не преку носталгија, туку преку иднина. Слоганот „Денес, за утре“ не е само фраза – тоа е определба:
„Да не повторуваме, туку да продолжиме. Да не чуваме само, туку и да пренесеме. Да создадеме ново од старото.“
„Етно Македонија“ е токму таков пример – музичка лабораторија што од народната културна меморија создава жива и актуелна уметност.
Нематеријалното културно наследство – во движење, во звук, во иднината…
Во духот на мисијата на фестивалот, концертот ја потврди идејата дека фолклорот не е архива – туку медиум: тој зборува, прашува, помирува и создава заедница.
Илинденските денови веќе 55 години поставуваат важно прашање – кои сме, што носиме и зошто тоа треба да се слушне гласно во светот?
Едно потсетување:
Официјалниот постер и визуелната естетика на фестивалот оваа година се дело на младата уметница Јована Тодороска, дипломирана графичарка од Факултетот за ликовни уметности. Инспирацијата доаѓа од симболиката на сонцето и космичкиот ред – визуелна метафора на фолклорот како универзум што живее преку формите, боите и движењето.
Фестивалот продолжува до 31 јули, а велерва од 18:30 е Големото дефиле по Широк Сокак.
“Илинденски денови” е еден од најголемите фестували кај нас со над 70 настани и 1.3000” учесници, со програма што обединува концерти, улични перформанси, изложби, семинари и интернационални фолклорни групи од сите страни на светот.
Фолклорот има иднина. И таа почнува тука – денес, за утре.
фотограф | Диоген Хаџи Коста Милевски
