Македонски
Краткотраен притвор во траење од 48 часа им е одреден на двајца осомничени за шверцот на 5-те тона марихуана кои беа запленети во Србија,
По предлог на јавен обвинител од Основното јавно обвинителство за гонење на организиран криминал и корупција, вчера на две лица, кои претходно беа сослушани во својство на осомничени, судијата на претходна постапка при Основниот кривичен суд Скопје им определи мерка краткотраен притвор во траење од 48 часа.
Како резултат на преземените дејствија и анализата на прибраните информации и докази, постојат основи на сомнение дека лицата преземале активности поврзани со запленетите 5 тони марихуана во Република Србија, поради што јавниот обвинител достави образложен предлог за определување краткотраен притвор, информираат од Обвинителството.
Оттаму појаснуваат дека барањето за определување на краткотрајниот притвор е со цел обезбедување на лицата и овозможување на доволно време на јавниот обвинител за преземање на неопходните процесни дејствија и донесување соодветна одлука за понатамошно постапување.
Во вакви случаи, особено кога се работи за предмети со поголема сложеност, како и предмети со меѓународен карактер, временските рокови често се ограничени, што ја оправдува примената на оваа мерка.
Основното јавно обвинителство за гонење на организиран криминал и корупција продолжува со интензивно постапување во предметот и јавноста ќе биде навремено информирана за понатамошниот тек, согласно законските можности, додаваат од Обвинителството за гонење на организиран криминал и корупција.
Од Кривичниот суд исто така ја потврдија информацијата.
За две лица за чл.215 ст.3 , А.И. и Д.С. прифатен е предлогот за краткотраен притвор од 48 часа заради постоење на основите од точки 1,2 и 3 односно опасност од бегатво, влијание врз сведоци и повторување, односно довршување на делото, информираа од Кривичниот суд.
