Македонски
Претседателот на Стопанската комора на Македонија, Бранко Азески ќе биде главен панелист на престижната 9. Регионална конференција – Еден Регион Еден Пазар – Чекор кон Единствениот пазар на ЕУ што се одржува денеска во Нови Сад.
Како што информира Комората, целта на настанот „Иднината на растот предводен од иновации 2025“ е да ги обедини водечките деловни лидери, креаторите на политики и претставниците на меѓународната заедница во насока на практично унапредување на регионалната економска интеграција на Западен Балкан.
-Азески ќе биде дел од јавна панел-дискусија на високо ниво, каде што се очекува да ги сподели своите ставови за економската соработка во регионот и стратешката улога на иновациите во поттикнувањето одржлив раст. Неговото присуство е потврда за континуираната заложба на Комората да ја унапреди регионалната поврзаност и да поддржи политики кои ги отсликуваат реалните потреби и барања на деловната заедница од регионот, наведува Комората.
Конференцијата ќе обедини над 150 учесници, меѓу кои претприемачи, генерални директори, инвеститори и претставници на владини институции од регионот и од Европската Унија. Главна намера е приватниот сектор да биде активно вклучен во креирањето јавни политики преку размена на идеи околу елиминирањето на трговските бариери, поттикнувањето инвестиции и создавањето функционален заеднички пазар.
-Како носечки регионален глас во економската сфера, присуството на претседателот Азески на овој значаен меѓународен форум ја потврдува проактивната улога на Македонија во обликувањето на иднината на економијата во Западен Балкан, истакнуваат од Стопанската комора.
