Едно дете починало, повеќе се повредени во нападот во основното училиште во Загреб

Едно дете им подлегнало на повредите здобиени во утринскиот напад во основно училиште во Загреб, Хрватска, јавува „Јутарњи лист“, повикувајќи се на неофицијални извори.

Она што е засега потврдено е дека осум лица се во болница, меѓу кои деца и учителка пред пензија, која се бори за живот.

Нападот го извршил „млад маж“, кој според информациите на „Јутарњи“, исто така се наоѓа во болница.

Денеска, 20 декември, околу 9:50 часот, млад човек со остар предмет повреди наставник и неколку ученици во воспитно-образовна установа во месноста Пречко. Напаѓачот е под полициски надзор. На повредените им е укажана лекарска помош, соопшти полицијата.

Полицијата е на терен како и неколку амбулантни возила, јавија загрепските медиуми.

Медиумите снимија како во дворот на училиштето слетува хеликоптер на итната медицинска помош.

Во Хрватска денеска е крај на првото полугодие во училиштата.