Македонски
Поразот на Македонија од Унгарија со неверојатни 41:0 на Balkan Waterpolo Games 2026 (У16) не е само тежок резултат. Тој е симбол на подлабок проблем кој со години се игнорира.
Дали ова е само еден лош ден? Или конечно е време да признаеме дека македонскиот спорт тоне сè подлабоко?
Во најважните и најрелевантни спортови, Македонија со години бележи слаби резултати на меѓународната сцена. Наместо системски развој, стратегија и вложување во младите, често се радуваме на „големи успеси“ од турнири и натпреварувања кои, за жал, во светот на спортот немаат сериозна тежина.
Додека другите држави создаваат олимпијци, европски и светски шампиони, ние премногу често создаваме привид дека сè е во ред. Организираме прослави, објавуваме фотографии со медали и титули, а реалноста на теренот е сосема поинаква.
Резултат како 41:0 не смее да биде повод само за критика на младите ватерполисти. Напротив, тие се последните што треба да ја понесат вината. Одговорноста е кај системот – кај оние што со години управуваат со спортот, носат одлуки и трошат средства, а резултатите постојано изостануваат.
Можеби најголемото прашање не е како изгубивме со 41:0.
Туку – до кога ќе се лажеме дека сме на вистинскиот пат?
Ако и по вакви резултати не се вклучи алармот, тогаш проблемот не е само во ватерполото. Проблемот е многу поголем – во начинот на кој го градиме македонскиот спорт.
извор: Макспорт.мк
