Тони Стојановски оди во Арена спорт!

Следниот ангажман на досегашниот спортски коментатор на Македонската телевизија, Тони Стојановски, ќе биде во Арена спорт.

Регионалниот телевизиски канал, кој емитува спортска програма на просторот на поранешна Југославија, е во процес на формирање македонска редакција, која треба да профункционира во наредните месеци, а Стојановски ќе биде дел од неа со уште неколку новинарски имиња од Македонија.

Коментаторот што си обезбеди место во аналите на македонското спортско новинарство со историскиот коментар по победата на фудбалската репрезентација на Македонија над Грузија во Тбилиси за прв пласман на европските првенства денеска го одработи последниот ТВ-пренос за МРТ.

Стојановски се промовира во еден од најдобрите спортски коментатори во земјава во текот на речиси 20. години поминати во јавниот сервис, од кои над 13 во МТВ и претходно во Македонското радио, а пред тоа беше дел од спортската редакција на тогашната А1 телевизија.

Денеска го одработев последниот пренос за МРТ. По повеќе од 13 години во телевизијата, а вкупно речиси 20 во јавниот сервис сметајќи го и времето во Македонското радио, дојде време за разделба.

Заминувам со многу спомени и со мноштво професионални задоволства. За знаењето ќе ценат други.

Ваквите одлуки не се лесни, но со оглед на околностите, по 28 години со новинарско-коментаторска кариера, ова е најдобро!

Новата страница е се уште празна, мое (наше) е да ја испишеме брзо и на убав начин.

Да сме живи и здрави!

Да живее Македонија!