Македонски
Овие велигденски мафини не само што се неверојатно вкусни туку и изгледаат неодоливо – како мини градинки со слатки моркови! Приготвени се со чоколадо, цимет и крем од лешници, а декорацијата ги прави вистинска празнична магија.
Идеални се за 6 лица, и ќе бидат хит на секоја семејна трпеза.
🧁 Состојки:
За мафините:
100 г путер
200 г шеќер
1 ванилин шеќер
4 јајца
200 мл млеко
50 г чоколадо (растопено)
130 г брашно
50 г какао
50 г пудинг од чоколадо
1/2 прашок за печиво
1 лажиче сода бикарбона
1 лажиче цимет
За декорација:
200 г крем од лешници
350 г марципан
Чоколадни трошки
Портокалова и зелена прехранбена боја
Приготвување:
Пенесто изматете го путерот со шеќерот и ванилиниот шеќер. Додавајте едно по едно јајце, мешајќи со миксер. Вмешајте ги растопеното чоколадо и млекото. Измешајте ги сувите состојки и додајте ги во смесата постепено.
Распоредете ја смесата во хартиени кошнички во калап за мафини (до 3/4) и печете ги 20 минути на 180°C.
Кога ќе се оладат, внимателно издлабете им го средиштето. Премачкајте ги страните со крем од лешник, превртете ги и втиснете ги во чоколадни трошки.
Од обоениот марципан направете морковчиња и листови, па поставете ги во издлабениот дел на мафините.
Совет: Декорацијата може да се направи и со фондан-смеса, по желба.
Извор: Убавина и здравје
