Македонски
Продолжува континуитетот на Семинарот за традиционална музика и игра кој се оддржува во Центарот за култура „Трајко Прокопиев“ во Куманово. Покрај темите „Од Средорек до Дурачка Река“, „ШОПЦИ КОТОРЦИ“ и „Накуде Скопје“, следува иновативна и дискутабилна тема…
Кога сите беа свртени кон наметнатата глобализација и мегаломанското знаење, двајца (гледано од денешен аспект) ентузијасти започнаа една иницијатива, која денес прерасна во комплетно научно и уметничко движење. Поставувајќи ја тезата „од локална едукација до глобални знаења“ го ставија на пиедестал локалното. Лоцирани во градот Куманово, историски гледано Жеглигово, ја истражија духовната и материјалната култура на истиот, контемплирајки, ја поставија во целосна приказна и почнаа да ја дистрибуираат на младата популација. Во изминатите три години, се реализираа едукативни работилници кои младото, пред се, кумановско население го едуцираа за сопственото културно наследство. Се повлекоа значајни паралели со соседните етнички предели и целата област, каде младите од овој дел живеат и им беше пренесена како значаен дел од културното наследство на целата земја.
Нашата важна премиса „само преку спознавање на локалното, може да се стигне до глобални знаења“, доби свое заокружување годинава. Годинешниот семинар под наслов „ГЛОБАЛНОТО КАЈ ЛОКАЛНОТО“ ќе биде вистинско доживување за младата популација во Куманово и пошироко. Дебата, дискусија, методологија, критика ќе биде основата на овој семинар. Што значи орото Поступано за северното игроорно подрачје, што значи гајдата како инструмент во Брсјачката етнографска целина, што значи групата Костручанки за нашата земја, што значи празникот „Четересе“ во градот Штип, што значи да се обработи и постави обред на сцена, се едни од темите за дискусија на првиот ден од семинарот. Накратко, глобалните сегменти како влијаат на локалните. Во вториот, практичниот дел на семинарот, ќе бидат обработени најкарактеристичните ора од сите пет игроорни подрачја Копачка, Беранче, Тешкото и Поступано…
Семинарот за традиционлна музика и игра ќе понуди од базични етнолошки и етнокореолошки информации до врвни научни дострели по прашање на овие науки. Целта на овој проект е афирмација на традиционалната култура во функција на запознавање и доближување кај младата популација, афирмацијата на младите уметници кои се занимаваат со истата, како и стручни усовршувања на носителите на дејноста.
Мастеркласот и останатите работилници ќе го оддржат етнокореолози и етнолози кои се млади кадри, но веќе етаблирани во својата дејност.
Семинарот е во организација на Центарот за култура – Куманово и е поддржан од страна на Министерството за култура и туризам како проект од нациоанлен интерес за културата, а ќе биде оддржан на 8 и 9 Април од 18:00 часот, во фоајето и големата сала на НУЦК „Трајко Прокопиев“ – Куманово.
