Македонски
„Сметам дека она што Доналд Трамп ѝ го прави на Канада е апсолутно одвратно“, рече Хјугет Бодоен.
Талкајќи низ супермаркет во Монтреал, 80-годишната жена застанала внимателно да ја проучи етикетата на пакувањето супа од кромид за да утврди дали е направено во САД.
Купувањето американски производи за неа, како и многу други, сега не доаѓа предвид, дури и ако тоа значи дека ќе мора да се одрече од нешто.
„Мораме да реагираме“, рече таа.
Трамп, кој овој месец триумфално се врати во Белата куќа, најави воведување царини од 25% на увозот од Канада, обвинувајќи ја Отава дека не прави доволно за сузбивање на илегалната имиграција и шверцот со фентанил.
Канадскиот премиер Џастин Трудо во понеделникот изјави дека американските царини, кои требаше да стапат на сила во вторник, ќе бидат одложени за 30 дена, откако му вети на Трамп дека ќе ги заостри безбедносните мерки на границата со САД, ќе назначи службеник за борба против фентанил и за сузбивање на перењето пари.
Но, во својата прва реакција, тој најави одмазднички царини, повикувајќи ги Канаѓаните да купуваат локално и да размислат да го поминат својот одмор во Канада наместо во САД.
Изгледа го послушаа. Неколку луѓе од различни градови со кои разговараше AFP пред да се објави суспензијата на санкциите рекоа дека ќе го направат токму тоа.
Памела Тенант, која живее во Онтарио, планирала да ја посети Јужна Каролина во март, но се предомислила, налутена од нападите на Трамп.
„Се плашам дека Американците на крај ќе поверуваат во она што го зборува Трамп“, вели таа. „Нѐ смета за лош сосед. На целиот свет му кажува дека сме лоши луѓе и дека ги искористуваме“, но тоа е „сѐ лага“.
На социјалните мрежи кружи список на американски производи што треба да се бојкотираат.
Неколку провинции, вклучително и Онтарио, која продава американски алкохолни пијалаци во вредност од 1 милијарда долари секоја година, соопштија дека веднаш ќе престанат да продаваат американско пиво, вино и алкохолни пијалаци во знак на протест.
„Не ја започнавме оваа битка, но ќе ја добиеме“, изјави во понеделникот премиерот на Онтарио, Даг Форд.
Бојкотот ќе има влијание врз американските производители и бизниси, но Канада сѐ уште е „релативно мал пазар“ за нив, така што ќе биде „првенствено симболичен“, вели Џулиен Фредерик Мартин, професор по економија на Универзитетот „Квебек“ во Монтреал.
Но, престанокот на пристигнувањето на канадските туристи „може да има значително економско влијание“ врз американските држави како Мејн, Флорида, Калифорнија и Аризона, рече Лорн Шихан, професор на Универзитетот „Далхози“, специјализиран за туризам.
САД се главната дестинација за одмор за Канаѓаните. Во 2023 година беа направени повеќе од 25 милиони посети за работа, одмор или шопинг.
И канадските навивачи изразија гнев, исвиркувајќи ја американската химна на НХЛ хокеј натпреварот на Отава Сенаторс против Минесота Вајлд, како и на кошаркарскиот НБА натпревар на Торонто Репторс против Лос Анџелес Клиперс.
