Skip to main content

Нови напади врз танкери во Ормускиот теснец

Нови напади врз танкери се пријавени денеска во Ормускиот Теснец, една од најважните светски рути за транспорт на нафта, каде што поморскиот сообраќај веќе е значително намален поради безбедносните ризици. Британската служба за поморска безбедност UKMTO соопшти дека добила два извештаја за танкери погодени со непознати проектили во близина на брегот на Оман. Засега не е утврдено дали станува збор за два различни брода или двата извештаја се однесуваат на ист танкер.

Првиот инцидент бил пријавен на околу 20 километри северно од градот Хасаб, каде што бил погоден задниот дел на танкер што излегувал од теснецот. Вториот бил пријавен на приближно 31 километар источно од истиот град, при што проектил ја погодил машинската просторија на танкер. Во двата случаи нема пријавени човечки жртви, додека евентуалните последици врз животната средина остануваат непознати. Инцидентите следуваат по нападот од петокот, кога танкер бил погоден во предниот лев дел, по што на бродот избувнал пожар. Кој го извршил нападот и каков проектил бил употребен засега не е утврдено.

Серијата напади во изминатите денови веќе има сериозни последици за екипажите. Танкерот за течен нафтен гас „Тара гас“ бил погоден двапати на 16 и 17 ноември, при што еден морнар исчезнал, а двајца биле повредени. Во одделен напад врз танкерот „Навиг8 Меси“ на 17 ноември биле повредени 11 членови на екипажот, додека еден останал исчезнат. Заедничкиот поморски информативен центар JMIC го оценува нивото на опасност во Ормускиот Теснец како сериозно, предупредувајќи дека „натамошни напади се многу веројатни“.

Последните податоци на UKMTO покажуваат дека од 12 до 18 ноември низ теснецот биле регистрирани 263 преминувања на бродови, наспроти 308 претходната недела, што претставува пад од речиси 15 проценти. Според службата, сообраќајот останува приближно 65 проценти под нивото пред почетокот на конфликтот во февруари. Сепак, помалиот број бродови не значи дека за ист процент се намалени и количините на транспортирана нафта.

Ормускиот Теснец ги поврзува големите производители на нафта од Персискиот Залив со светските пазари. Според Меѓународната агенција за енергија, во 2025 година низ него дневно минувале околу 20 милиони барели сурова нафта и нафтени деривати, односно приближно една четвртина од светската поморска трговија со нафта. Постојат алтернативни нафтоводи, но нивниот капацитет не е доволен целосно да го замени овој премин.

Нафтените пазари засега не покажуваат знаци на нагло поскапување предизвикано од последните инциденти. Во петокот цената на нафтата „брент“ порасна за 0,64 проценти, на 92,57 долари за барел, додека американската WTI достигна 83,98 долари. На неделно ниво, сепак, цените се намалија поради очекувањата за доволна понуда. „Оваа недела и натаму имаме релативно силни извозни текови од Блискиот Исток“, изјавил за Ројтерс Алдо Спанјер, стратег за суровини во БНП Париба.

Засега нема потврден нов глобален недостиг на нафта како непосредна последица од најновите напади. Сепак, продолжувањето на инцидентите претставува ризик за испораките, а евентуално подолготрајно нарушување на пловидбата низ Ормускиот Теснец би можело да создаде дополнителен притисок врз цените на нафтата и горивата.

Поврзани вести