Македонски
Британскиот писател М. Џон Харисон, на возраст од 81 година, ја освои Букеровата награда за 2026 година за романот „Крајот на сè“, со што стана најстариот добитник на едно од најпрестижните книжевни признанија во светот.
Харисон ја доби наградата на свечената церемонија во Лондон, заедно со парична награда од 50.000 фунти. Одлуката ја донесе жирито предводено од историчарката и писателка Мери Берд, а изборот на победникот бил едногласен.
Романот „Крајот на сè е тринаесеттото дело на Харисон. Сместен е во блиска иднина, на брегот на англиската област Кент, во општество кое се обидува да продолжи да функционира по мистериозна катастрофа. Приказната ги следи Филип Тенент, човек кој собира предмети што морето ги исфрла на брегот, и неговата тетка Марни. Преку нивните животи, авторот создава дистописка сатира за општеството, политиката и неизвесноста на иднината.
Со ова признание, Харисон го надмина досегашниот рекорд на Маргарет Атвуд, која имаше 79 години кога во 2019 година ја освои Букеровата награда за романот „The Testaments“, заедно со Бернардин Еваристо, која ја доби наградата за „Girl, Woman, Other“.
Ова е прва Букерова награда и за издавачката куќа „Serpent’s Tail“, која го објави победничкиот роман.
Букеровата награда се доделува секоја година за најдобар роман напишан на англиски јазик и објавен во Обединетото Кралство или Ирска. Таа е едно од најзначајните признанија во современата книжевност и често придонесува за меѓународната афирмација на наградените автори.
