Македонски
Православните верници утре го одбележуваат денот посветен на Преподобната мајка Параскева, во народот познат како Петковден.
Света Петка била од словенско потекло, родена во градот Епиват. По смртта на нејзините родители, најголемиот дел од животот го минала во Јорданската пустина во пост и молитва. Се успокоила во 11-тиот век во родното место, а нејзините чудотворни мошти денес се наоѓаат во градот Јаши, Романија.
Со празникот се поврзани бројни народни обичаи и верувања кои со векови се пренесуваат од генерација на генерација.
Според традицијата, на Петковден се избегнуваат тешките физички работи, перењето облека и шиењето, а особено се нагласува значењето на молитвата, духовниот мир и почитувањето на празникот.
Во многу македонски семејства Света Петка се празнува како домашна слава, со свечена трпеза, молитви и пречекување гости.
Посебно место во народните верувања имаат изворите и чешмите покрај храмовите посветени на светицата. Верниците традиционално ги посетуваат овие места, верувајќи дека водата носи благослов и духовна утеха.
Света Петка во народот е позната и како Мајка Параскева, а нејзиниот празник симболично го означува почетокот на зимскиот циклус православни празници.
Во црковната традиција се одбележуваат три личности со истото име: Света Петка Епиватска (Трновска), Света Петка Римјанка (8 август) и Света Петка од Иконија (10 ноември).
Во македонската народна традиција Света Петка се почитува како заштитничка од несреќи и болести. Голем број семејства празникот го одбележуваат со домашна слава, а за нејзиното име се поврзани и повеќе лековити извори познати како Петочни води.
Утре именден празнуваат сите кои ги носат имињата Петко, Петкана, Параскева, Пенка и нивните изведени варијанти.
