Македонски
Администрацијата на американскиот претседател Доналд Трамп ја суспендираше компанијата Мајкрософт од програмата која овозможува поднесување барања за добивање зелени карти за странски работници кои доаѓаат во Соединетите Американски Држави со визи H-1B, бидејќи компанијата го злоупотребувала тој систем, изјави денеска потпретседателот на САД Џеј Ди Венс.
Тој на прес-конференција во Белата куќа го обвини Мајкрософт дека програмата ја користел за вработување странски работници на сметка на американските работници.
Венс рече дека компаниите, пред да поднесат барање за зелена карта за странски работник, мора да го огласат работното место во САД и да докажат дека не можат да најдат соодветен американски работник.
Тој наведе дека Мајкрософт минатата година отпуштил околу 6.000 американски работници, додека истовремено добил одобрение за околу 6.300 визи H-1B и речиси 3.000 зелени карти.
Нашата порака до Мајкрософт е: Вие сте голема американска компанија, но морате да вработувате големи американски работници – рече Венс на прес-конференција во Белата куќа.
Мајкрософт, чие седиште е во Редмонд, во сојузната држава Вашингтон, засега не ја коментираше информацијата.
Визите H-1B се наменети за висококвалификувани странски работници кои доаѓаат на работни места за кои е тешко да се најдат работници во САД. Технолошките компании се меѓу најголемите корисници на оваа програма, а речиси три четвртини од одобрените визи ги добиваат работници од Индија.
Венс оцени дека странските работници со визи H-1B се во понеповолна положба бидејќи, доколку ја изгубат работата, може да бидат принудени да ги напуштат САД, како и дека во одредени случаи заработуваат помалку од американските работници на слични позиции.
Најновата одлука е дел од пошироката политика на администрацијата на Доналд Трамп насочена кон програмите кои им овозможуваат на странците да работат и студираат во САД.
Еден ден претходно, Министерството за внатрешна безбедност предложи воведување такса од 70.000 долари за странски студенти чии образовни установи би сакале да учествуваат во програмата за практична обука OPT, која им овозможува на студентите да работат на работни места поврзани со нивните студии.
Венс истовремено повика на истрага за можни злоупотреби на програмата за визи J-1, кои им овозможуваат на странски државјани привремено да престојуваат во САД заради работа и програми за размена.
Како потенцијално спорни, тој наведе девет универзитети за кои тврди дека ја користат оваа програма во поголема мера од другите такви институции.
Најновата одлука за Мајкрософт била соопштена само неколку часа пред Трамп да му го врачи Националниот медал за технологија и иновации на извршниот директор на Мајкрософт, Сатја Надела.(МИА)
