Македонски
Музичка младина на Македонија организира концерт на младите музичарки Леона Кондратенко на виола и Фатима Алиева на пијано, кој ќе се одржи на 28 септември во Камерната сала на Македонската филхармонија, со почеток во 19:30 часот. Концертот е дел од циклусот „Млади за млади“, а влезот за публиката е слободен.
Настапот во Скопје претставува дел од институционалната соработка меѓу Музичка младина на Македонија и Музичка младина на Србија. Ова партнерство отвора простор за директна размена и сценско поврзување на младите изведувачи од двете средини.
Како дел од оваа соработка, Кондратенко и Алиева на 21 септември одржаа концерт во Белград, организиран од српскиот огранок на младинската музичка мрежа. По позитивниот прием кај тамошната публика, дуото ја продолжува концертната соработка со настапот пред македонските слушатели.
Програмата „Млади за млади“ со години функционира како сцена каде новата генерација музичари гради професионално искуство надвор од стандардните академски рамки.
Леона Кондратенко е родена во Бон, Германија, а своето високо музичко образование го стекнува на Високата школа за музика и танц во Келн, во класата на професорот Александар Земцов. Зад себе веќе има повеќе солистички и камерни настапи, како и меѓународни признанија.
Пијанистката Фатима Алиева потекнува од Баку, Азербејџан, а студиите исто така ги продолжува во Германија. Нејзиниот досегашен профил бележи награди на меѓународни фестивали и редовни камерни проекти.
На сцената во Камерната сала двете уметнички ќе изведат композиции од широк стилски дијапазон. На репертоарот се најдоа дела од Роберт Шуман, Јорк Боуен, Сони Петровски, Бохуслав Мартину, Дмитриј Шостакович и Мануел де Фаља.
Настанот се реализира со финансиска поддршка на Министерството за култура и туризам.
