Македонски
Иако Државна лотарија е компанија во државна сопственост, директорот Александар Климовски тврди дека нејзините средства не се автоматски и буџетски пари. Одговарајќи на прашањето зошто се инсистира дека 300-те милиони денари потрошени за прославата на независноста се компаниски, а не буџетски средства, Климовски рече дека правниот статус на компанијата е клучен за оваа разлика.
Лаички што кажувате е едно. Законски и формално-правно е друго. Зошто? Затоа што Лотарија има посебен правен субјективитет“, рече Климовски.
Според неговото образложение, фактот што основач на Државна лотарија е Владата не значи дека јавните овластувања на Владата се пренесуваат и врз самото акционерско друштво.
Тоа што основач е ентитет со јавноправни овластувања не ги пренесува тие јавноправни овластувања во Лотарија. Тие ги има по Законот за Владата кога одлучува по прашања во надлежност на Владата. Овде е акционер“, рече Климовски.
Тој тврди дека токму посебниот правен субјективитет на Државна лотарија е причината поради која приходите на компанијата, додека се на нејзините сметки, не можат да се третираат како средства од државниот буџет.
Ова прашање е законско, не лаичко-новинарско. Тоа се посебни пари, со посебен правен ентитет. Парите ќе станат буџетски кога низ одредена процедура и одредени одлуки ќе дојдеме до точка да ги уплатиме во трезорската сметка. Сè додека не дојде до уплата на парите – тие не се буџетски“, рече директорот на Државна лотарија.
На истото прашање се надоврза и владината портпаролка Марија Митева, која рече дека доколку се бара Владата да постапува според законот, тогаш и статусот на средствата мора да се определува според законските правила.
Кога сакаме Владата да работи согласно словото на законот, тогаш мора да постапуваме по законот и да кажуваме како е законот“, рече Митева.
Таа додаде дека, според неа, не би било спорно ниту доколку за одбележувањето на 35 години независност биле определени средства директно од Буџетот, но потенцира дека во конкретниот случај парите не биле обезбедени оттаму.
Се согласувам, 35 години независност на државата и да се решело да се определат парите од Буџетот, тоа за мене или друг не би било проблем. Но овие средства не се од таму. Ова се пари од добивката од 2024 година, кои се потрошија за прославата, а не за некакви слотови“, рече Митева.
Станува збор за 300 милиони денари од нераспределената добивка на Државна лотарија за 2024 година, за кои Климовски и Митева тврдат дека до моментот на нивното издвојување за прославата имале статус на средства на компанијата, а не на средства во државниот буџет.
