Македонски
Албанскиот премиер Еди Рама денеска застана во одбрана на континуираната поддршка на Албанија за Украина, реагирајќи по изјавата на украинскиот претседател Володимир Зеленски дека Киев нема да го признае Косово. Во исто време, Рама упати остри критики до, како што ги нарече, гласните националистички реакции во Тирана и Приштина.
„Мојот драг пријател Володимир Зеленски застана во Белград и рече дека Украина не ја променила својата позиција и нема да го признае Косово. Во рок од еден час, најгласните ‘народни националисти’ во Тирана и Приштина веќе посегнаа по геополитичкиот калкулатор: можеби треба да ја казниме Украина, да престанеме да навиваме за слободните и да тагуваме за бомбардираните. Најбезобразните меѓу нив фрлаа камења врз нас затоа што не се откажавме од Украина, а некои дури почнаа да навиваат за Русија!“, напиша Рама во објава на социјалната мрежа Икс.
Албанскиот премиер истакна дека принципите и борбата за слобода не смеат да се сведуваат на политичка трговија или замена на услуги.
„Слободата не функционира на принцип на ‘поврат на пари’ и спротивставувањето на агресорска војна и залагањето за праведен мир не е сметка што се кине кога жртвата ќе разочара. Тоа не е услуга што се разменува за услуга, туку тоа е тоа што си и за што се залагаш во овој хаотичен свет. За среќа, Албанија не е ‘мал човек’ што пресметува кој кому должи, туку Европа на Балканот што го покажува патот преку својата вера во слободата, демократијата и мирот, и преку силата на својот пример“, порача Рама.
Тој додаде дека Украина „може да биде, и да, навистина е во заблуда за Косово, но нејзиното право да биде слободна останува неспорно“, нагласувајќи дека борбата за тоа право е воедно и „борба за Европа и за самите нас“.
„Овие вистини совршено можат да живеат во иста реченица. Албанија е доволно зрела да ги носи обете и ќе ги носи обете. Слободна Украина – денес, утре и секогаш“, заклучи албанскиот премиер.
Поводот за оваа реакција беше изјавата на украинскиот претседател Володимир Зеленски за време на неговата посета на Србија на 8 август. Прашан во Белград за ставот на неговата земја, Зеленски изјави дека позицијата на Украина за Косово останува непроменета – Киев не ја признава независноста на Косово и целосно го почитува територијалниот интегритет на Србија. Ваквиот став предизвика бран негативни реакции во Косово, кои кулминираа со демонстративно отстранување на украинско знаме од зграда во самиот центар на Приштина
