Македонски
Воената криза на Блискиот Исток повторно ги потресе светските финансиски пазари. На повеќето азиски берзи во понеделникот паднаа цените на акциите, додека цените на нафтата нагло пораснаа откако американскиот претседател Доналд Трамп порача дека иранскиот одговор на американскиот предлог за завршување на војната е „целосно неприфатлив“.
Во исто време, инвеститорите стравуваат од дополнително влошување на состојбата, особено поради продолжувањето на блокадата на Ормускиот Теснец, еден од најважните правци за транспорт на нафта од Персискиот Залив.
Азиските берзи под притисок поради војната на Блискиот Исток
MSCI индексот на азиско-пацифичките акции утрово беше во плус околу 0,5 проценти, но тргувањето на повеќето пазари беше претпазливо.
Берзанските индекси во Хонг Конг, Јапонија, Австралија и Индија паднаа меѓу 0,2 и 1,1 проценти. Од друга страна, пазарите во Шангај и Јужна Кореја забележаа раст меѓу 0,9 и 4,4 проценти.
Јужнокорејскиот индекс Коспи достигна нова рекордна вредност благодарение на силниот раст на акциите на производителите на чипови, бидејќи пазарот повторно го зафати еуфорија околу развојот на вештачката интелигенција.
Сепак, повеќето инвеститори остануваат внимателни бидејќи не се гледа крај на судирот меѓу Иран и Израел.
Трамп го отфрли иранскиот предлог за прекин на војната
Иран претходно преку државните медиуми соопшти дека му испратил одговор на Вашингтон на американскиот предлог за мировни преговори. Техеран наведе дека бара прекин на војната на сите фронтови, укинување на санкциите, крај на поморската блокада и иранска контрола врз Ормускиот Теснец.
Сепак, Трамп во неделата јасно порача дека таквиот одговор е неприфатлив.
Во меѓувреме, израелскиот премиер Бенјамин Нетанјаху изјави дека војната со Иран не е завршена и дека Израел и САД и натаму сакаат да ги запрат иранските нуклеарни амбиции.
Нафтата поскапе за повеќе од четири проценти
Поради продолжувањето на блокадата на Ормускиот Теснец, цените на нафтата утрово нагло пораснаа.
На лондонскиот пазар цената на нафтата Брент скокна за 4,34 проценти и достигна 105,70 долари за барел.
Американската WTI нафта поскапе за 4,82 проценти, на 100,05 долари за барел.
Економистот на банката JPMorgan Chase, Брус Касман, предупреди дека секој нов ден од блокадата го зголемува ризикот од дополнителен раст на цените на енергенсите.
„Судирот на Блискиот Исток влегува во 11-та недела. Цените на нафтата значително пораснаа и претставуваат ризик за забавување на глобалниот економски раст, но не и за негов целосен прекин. Сепак, ризикот од нови поскапувања расте со секоја недела од блокадата на Ормускиот Теснец“, рече Касман.
Доларот повторно јакне како сигурно засолниште
На девизните пазари доларот зајакна по две недели пад, бидејќи инвеститорите американската валута и натаму ја сметаат за сигурно засолниште во периоди на геополитичка неизвесност.
Индексот на доларот утрово се движеше околу 98,10 поени, додека во петокот изнесуваше 97,84 поени.
Курсот на доларот во однос на јапонскиот јен порасна од 156,65 на 157,15 јени.
Американската валута зајакна и во однос на еврото, па европската валута ослабе на 1,1755 долари, во споредба со 1,1785 долари колку што изнесуваше кон крајот на минатата недела.(МИА)
