Македонски
Висока делегација од Специјална Олимпијада Европа Евроазија (SOEE), предводена од Претседателот и Извршен директор Свен Албрехт, ја посети Македонија во период од 4 до 6 мај и се сретна со Претседателот на Владата Христијан Мицкоски, со цел унапредување на напорите за проширување на програмата “Unified Sports“ и инклузивното образование низ целата земја.
Посетата на Скопје ги собра лидерите на Владата, меѓународните институции, граѓанското општество и атлетите и ја истражи потенцијалната улога на Македонија во Глобалната коалиција за инклузија на Специјалната олимпијада (Special Olympics Global Coalition for Inclusion). Коалицијата е мултилатерална платформа која соработува со владите, приватниот сектор и глобалната филантропија за да го прошири досегот и влијанието на инклузивното образование преку спортот ширум светот.
Програмата вклучуваше средба на високо ниво со претседателот на Владата на Македонија, Христијан Мицкоски, средби со претставници на Министерството за образование и наука, Министерството за Спорт, Министерството за социјална политика, демографија и млади, како и средби со агенции на Обединетите нации, вклучувајќи ги УНИЦЕФ и УНФПА и делегацијата на Европската Унија. Во рамки на посетата беа опфатени и културни настани и инклузивни спортски активности.
Свен Албрехт изјави: “Македонија покажа силно лидерство во унапредувањето на инклузивното образование и спортот, а оваа посета има за цел продлабочување на таа посветеност на сите нивоа на општеството. Кога владите, едукаторите, меѓународните партнери и атлетите работат заедно, инклузијата преминува од визија во реалност. ’Unified’ училишта се една од најмоќните алатки што ги имаме за да се погрижиме дека секој млад човек учи, игра и расте во заедништво.”
Делегацијата на Специјална Олимпијада Европа Евроазија, исто така, одржа работни состаноци со Министерството за образование и наука за имплементација на “Unified“ училишта во рамките на националниот образовен систем, и со Министерството за социјална политика, демографија и млади за усогласување на напорите со Конвенцијата на ОН за правата на лицата со попреченост. Дискусиите со Делегацијата на ЕУ беа фокусирани на усогласување на националните инклузивни рамки со европските стандарди.
Моника Бошкоска, Претседател на Специјална Олимпијада Македонија, истакна: „Инклузијата мора да се препознае и третира како стратешки приоритет, на исто ниво како што тоа го прават европските земји. Таа не треба да остане само декларативна заложба, туку да се претвори во реални и конкретни политики и системски решенија со континуирана поддршка од институциите. Имаме знаење, партнерства и реални примери дека инклузивниот пристап функционира. Потребни се храброст и координирана акција за да обезбедиме еднакви можности за сите.“
Христијан Мицкоски, Претседател на Владата, ја истакна посветеноста на земјата за зајакнување на инклузивните политики: “Инклузијата не е само општествена одговорност, туку и национален приоритет. Преку нашата соработка со Специјалната олимпијада и меѓународните партнери, работиме на тоа да обезбедиме секое дете и млад човек, без оглед на способностите, да има еднаков пристап до спортот и образованието.”
Средбите со Министерството за спорт, Олимпискиот Комитет на Македонија и Лајонс Македонија дополнително се фокусираа на зајакнување на партнерствата и дефинирање на следните чекори за проширување на иницијативите за унифициран спорт и лидерство на атлетите.
Посетата ја нагласи долгорочната посветеност на Специјална олимпијада за градење инклузивни општества преку спорт, образование и институционална соработка, и ја зајакнува улогата на Македонија како клучен партнер во глобалното движење за инклузија.
###
За Специјална Олимпијада Македонија
Формирана пред повеќе од 20 години, таа е дел од Специјалната Олимпијада (Special Olympics), светски раширено движење активно во повеќе од 150 држави од целиот свет, со над 2.2 милиони активни учесници и околу 750.000 волонтери. Како олимписки партнер на Меѓународниот Олимписки Комитет (International Olympic Committee), Специјалната Олимпијада годишно организира и реализира повеќе од 200 национални програми – натпреварувања кои вклучуваат локални, национални, регионални и светски натпревари, турнири и игри.
Специјална Олимпијада Македонија функционира како непрофитабилна и невладина организација која опфаќа еден многу важен општествено-социјален сегмент, со посебен акцент кон лицата со пречки во развојот. Специјална Олимпијада Македонија има 10.000 активни членови, од кои 2.500 се Атлети.
