Аларм во Шпанија: Мигрантите ги поплавуваат Балеарските Острови

Бројот на мигранти што пристигнуваат на Балеарските Острови во Шпанија се зголемил во изминатиот месец, при што 19 бродови со околу 360 луѓе пристигнаа на медитеранските острови само во последните два дена, соопштија шпанските власти.

Пристигнувањата преку западната медитеранска рута, главно на бродови што доаѓаат од Алжир, се зголемиле за 27 проценти помеѓу јануари и октомври во споредба со истиот период минатата година, објави „Ројтерс“.

Зголемувањето е најголемо меѓу рутите по кои мигрантите влегуваат во Европската Унија и доаѓа во време кога вкупните пристигнувања во ЕУ се намалиле за 22 проценти, според податоците од граничната агенција на ЕУ, Фронтекс.

Портпаролот на Фронтекс, Крис Боровски, изјави дека шверцерите на мигранти ги префрлаат своите операции од Мароко во Алжир, каде што контролите се помалку строги, како и дека Балеарските Острови се нивна главна дестинација.

Според најновите податоци на Фронтекс, Алжир во моментов учествува со 75 проценти од мигрантите што ја користат западната медитеранска рута.

Според официјалните шпански податоци, од почетокот на годината до октомври, на Балеарските Острови пристигнале 6.280 мигранти.