Македонски
Домашниот ајвар е еден од оние вкусови што мирисаат на есен, на топол дом и на семејни собирања. Со печени црвени пиперки, модар патлиџан и малку лута пиперка, овој ајвар е кремаст, ароматичен и совршен за зимската трпеза.
Потребни состојки:
- 5 кг црвени пиперки
- 2,5 кг модар патлиџан
- 500 мл масло
- 2 главици лук
- 1 свежа чили-пиперка
- сол по вкус
- црн пипер по вкус
- 1 лажичка шеќер
- лута мелена црвена пиперка по вкус
- малку доматно пире, по желба
Подготовка:
Пиперките и модриот патлиџан добро измијте ги. На пиперките отстранете им ги дршките, а потоа распоредете ги во два поголеми плеха. Печете ги пиперките во рерна со вентилатор на 210 °C околу 1 час. За време на печењето двапати заменете им ги местата на плеховите, а пиперките еднаш превртете ги за рамномерно да се испечат. Испечените пиперки ставете ги во голема цедалка поставена над длабок сад. Малку притиснете ги за да истече првата течност, а потоа покријте ги и оставете ги да се цедат преку ноќ. Модриот патлиџан исчистете го само од краевите и испечете го во плех на 220 °C околу 45 минути. Кога ќе се испече, преполовете го, отстранете ги семките и со лажица издвојте ја внатрешноста од кората. Ставете ја во цедалка и добро притиснете ја за да се исцеди вишокот течност. Оставете ја да се цеди преку ноќ.
Следниот ден излупете ги пиперките и исчистете ги од семето и повторно добро исцедете ги. Пиперките и модриот патлиџан сомелете ги или изблендирајте ги во процесор за храна, во неколку тури. Во голем сад загрејте малку од маслото и кратко пропржете го ситно исечканиот лук. Додајте ја смесата од пиперки и модар патлиџан во три наврати, добро мешајќи за сè да се соедини. Ајварот варете го на умерена температура, мешајќи за да не загори. Маслото додавајте го постепено, во неколку наврати, додека ја варите смесата. Вкупно се додаваат 500 мл масло. Откако ќе го додадете поголемиот дел од маслото, зачинете со сол, шеќер и црн пипер по вкус. Додајте малку доматен концентрат, а по желба и слатка и лута мелена црвена пиперка. Продолжете со варењето и мешањето додека ајварот не се згусне доволно. Готов е кога при поминување со дрвена лажица по дното на садот, смесата се одвојува и не се враќа веднаш назад.
Благ и лут ајвар:
Од готовиот ајвар наполнете две мали теглички – тоа ќе биде благиот ајвар.
Во преостанатата смеса додајте мелена лута пиперка по вкус. Варете уште околу 10 минути, па наполнете четири мали стерилизирани теглички. Тегличките стерилизирајте ги во рерна 20 минути на 120 °C пред да ги наполните. Откако ќе ги наполните со топол ајвар, вратете ги во рерната и оставете ги уште 15 минути на 150 °C, за на површината да се создаде тенка коричка. Во секоја тегличка одозгора додајте малку маслиново масло, затворете со капак и оставете ги во исклучена рерна додека целосно да се изладат.
Домашниот ајвар е подготвен за зимската трпеза!
