Македонски
Најмалку еден човек загина во синоќешниот американски воздушен напад врз цели на бунтовниците Хути во Јемен. Американската армија претходно соопшти дека бомбардирала воена локација во главниот град на Јемен, Сана, кој е под контрола на Хутите.
Според медиумите под контрола на бунтовниците, покрај Сана нападнати биле и градовите Ал Џавф и Сади. При нападот врз Сади загина едно лице, а четворица се повредени.
Хутите тврдат дека во обновените американски напади загинале најмалку 58 луѓе.
Трамп на 15 март презеде операција врз Хутите, само неколку дена откако јеменските бунтовници најавија дека повторно ќе преземат одмазднички напади врз израелски бродови кои минуваат низ Црвено и Арапско Море, теснецот Баб-ел-Мандеб и Аденски Залив поради тоа што Израел ја блокира хуманитарната помош за Појасот Газа. Со тоа заврши периодот на релативен мир, што почна во јануари со прекинот на огнот во Појасот Газа.
Хутите од ноември 2023 година нападнаа повеќе од 100 бродови во знак на поддршка со Палестинците поради војната во Појасот Газа. Поради нападите на Хутите беше нарушен глобалниот транспорт, а компаниите се принудени да бараат подолги и поскапи рути околу јужна Африка.
