Македонски
САД ја зајакнуваат одбраната на своите бази на Блискиот Исток со пренесување на противвоздушни системи „Патриот“ од Јужна Кореја
Јужна Кореја и САД направиле договор за привремено прераспоредување на ракетните системи за противвоздушна одбрана „Патриот“ од територијата на Јужна Кореја на Блискиот Исток. Ова е првпат да се случи вакво „позајмување“ на важна американска воена опрема од јужнокорејските бази, што предизвика бран шпекулации во јужнокорејскиот печат за можна промена на улогата на американските војници во Кореја.
Земјите се согласиле на „повеќемесечно“ делумно распоредување на системи „Patriot Advanced Capability-3“ (PAC-3), кои се способни да пресретнуваат балистички ракети. Системите се дел од повеќеслојниот систем за противракетна одбрана на Јужна Кореја, кои се во функција заедно со сопствената противвоздушна одбрана на Кореја. Во текот на изминатата недела, околу 50 американски транспортни авиони веќе пристигнаа на Арапскиот Полуостров од базите во Јужна Кореја.
Оваа необична одлука, според американскиот секретар за одбрана Пит Хегсет, е насочена кон бунтовниците Хути во Јемен, но кога се комбинира со други изјави и постапки (како што е распоредувањето на шест стратешки бомбардери Б-2 Спирит во базата Диего Гарсија), поверојатно е насочена кон Иран.
Ваквите отстранувања на оперативните батерии за воздушна и ракетна одбрана од одбранбените сили ја зголемија загриженоста во Јужна Кореја дека Вашингтон може да побара од Сеул да го зголеми финансирањето за УСФК или да ја преиспита улогата на американските трупи во земјата, како што се случува во Европа. Обединети сили за Кореја (УСФК) е воена команда на САД со седиште во Јужна Кореја, основана во 1957 година за да ја брани Јужна Кореја од заканите од Cеверна Кореја според Договорот за заемна одбрана меѓу САД и Јужна Кореја.
Американскиот претседател Доналд Трамп ова го нарекува „трансакциски пристап“ кон сојузниците, политика во која сојузничките обврски се оценуваат низ призмата на непосредна корист за САД. Тоа, исто така, може индиректно да го одрази недостигот на борбено подготвени системи „Патриот“ од овој тип во арсеналот на САД.
