Македонски
Екипи на Град Скопје од вчера започнаа голема акција на чистење на депонијата во Радуша, локација околу која изминативе денови се создаде непотребна паника и се пласираа тврдења дека наводно е загрозена водата од изворот Рашче.
Депонијата се наоѓа на неколку десетици километри од заштитената зона на изворот Рашче и не претставува основа за тврдењата што се ширеа во јавноста, вели во објава на Фејсбук, градоначалникот на Скопје Орце Ѓорѓиевски.
Но, кога станува збор за здравјето, сигурноста и спокојството на граѓаните, за нас нема ‘туѓа надлежност’. Иако чистењето на оваа локација не е обврска на Град Скопје, денес сме на терен и ја чистиме. Истовремено, сакам уште еднаш да бидам целосно јасен: водата во Скопје е безбедна за пиење! Секојдневно се вршат детални анализи во една од најсовремените лаборатории со која располага ЈП ‘Водовод и канализација’ – Скопје. Резултатите се јасни и нема простор за паника, шпекулации или ширење страв меѓу граѓаните“, нагласи Ѓорѓиевски.
Тој посочи дека оние случаи кои во текот на изминатите два дена создале вознемиреност и паника меѓу скопјани, веќе разговараат со надлежните органи.
Скопје е безбедно и така ќе остане. Никогаш нема да дозволиме неодговорност, негрижа или нечии манипулации да го загрозат здравјето и безбедноста на нашите сограѓани. Ќе реагираме секогаш, навреме и одговорно. Затоа што кога станува збор за Скопје и за луѓето кои живеат во него, нема компромиси. Скопје го чуваме. Скопје го штитиме. Заедно“, напиша градоначалникот.
