Четири министри од времето на СДСМ не ги ни почнаа реконструкциите, сега се бунат што ќе има доцнење од само два месеца?

Загрижува односот на политичката партија СДСМ, која денес организираше прес конференција за да изрази загриженост дека реконструкцијата на двата студентски дома во Скопје – „Кузман Јосифовски – Питу“ и „Стив Наумов“ наместо во октомври, ќе заврши во декември годинава!, вели министерката за образование Весна Јаневска, потсетувајќи дека тоа е истата политичка партија која ја предводеше Владата во чие време се сменија дури четири министри за образование и ниту еден не успеа да ја започне реконструкцијата на студентските домови.

Тоа се истите тие кои ги иселија младите од Македонија, а деновиве се најгласни дека сакаат да направат нешто за нив. За 7 години бројот на ученици е намален за 17 илјади, а на студентите за 7 илјади, што е резултат на лоши политики не само во образованието, туку генерално политики поврзани со младите. Кузман и Стив ќе се реконструираат до крајот на годината и ќе можат да примат студенти во вториот семестар на академската 2025-2026. Го интензивиравме процесот кој, повторувам дури четири министри во времето на СДСМ не успеаја да го започнат! Младите да бидат спокојни. Лажните вести и политички конструкции не треба да ги демотивираат да продолжат да вложуваат во своето знаење, а Министерството за образование и наука ќе продолжи да ги поддржува и да го подобрува студентскиот стандард. За една година прифатив 10тина нивни барања, така што и во иднина мој приоритет ќе бидат нивните интереси, порача министерката.