Македонски
На 29.март, во сабота со почеток од 12 часот, во Битолскиот театар ќе биде промовирана Монографијата „80 години Народен театар Битола“, на авторот д-р. Иван Додовски, испишана на 310 страници, испечатена од Графопром Битола. Промотори ќе бидат д-р. Мишел Павловски и д-р. Даниела Андоновска Трајковска.
Се работи за монографија која е црно бела, прва од ваков вид во државата.
Рецензенти се проф.д-р.Сузана Киранџиска и проф.д-р.Мишел Павловски. Уредници Билјана Крајчевска и Оливера Павловиќ, лектор Жаклина Атанасова, а монографијата ја припреми стручниот тим: Стеванка Вељановска, Билјана Вржовска, Сашо Илковски, Марија Козарова, Билјана Крајчевска, Александар Митровски, Филип Ошавков, Оливера Павловиќ, Владимир Переловски. Дизајнот е на Сергеј Светозарев. Фотографиите од архивот на НТБ.
Монографијата содржи кратка историја за растежот на институционалниот театар на македонски јазик во Битола во периодот од 1944 до 2024, како и прилози за сите одиграни премиери и за лицата што биле вработени или повремено ангажирани во работата на НТБ во овој период. Па така опфатени се темите за првиот репертоарски пробив, пресвртот со „Свадбата на Мара“, новите режисери и актери, постјугословенскиот контекст, гостувањето во Глоуб театарот, наградите, гостувањата низ светот и многу повеќе. Историјата на Народниот театар во Битола е сведоштво за еден растеж и за достигнување на врвни уметнички вредности што станале неизоставен дел од македонската културна меморија. Издавањето на монографијата е помогнато од Министерството за култура на Република Македонија.
