Македонскиот КИЦ во Загреб ја почна годината со хрватска премиера на „Приказната за Силјан“ на Тамара Котевска

Хрватската кино премиера на „Приказната за Силјан“ на Тамара Котевска се одржа вчера вечер во загрепското Докукино Киц. Хрватската кино премиера беше во организација на хрватскиот дистрибутер „Рестарт“, „Волим документарце“ и македонскиот Културно-информативниот центар во Загреб.

Во преполната кино сала публиката имаше ексклузивна прилика да го види најновото успешно остварување на македонската филмска документаристика. Публиката беше суптилно и моќно освоена од древната легенда за Силјан штркот, оживеана во поетска, моќна и визуелно волшебна филмска приказна за идентитетот, корените и човештвото.

Свои обраќања пред проекцијата на филмот имаа раководителката на ДОКУ КИНО КИЦ Дина Покрајац и директорката на македонскиот КИЦ во Загреб, Мими Ѓоргоска Илиевска, која во своето обраќање изрази посебна благодарност за поканата од страна на хрватскиот дистрибутер „Рестарт“ и платформата Volim Dokumentarce, македонскиот КИЦ во Загреб да биде еден од партнерите на кино-премиерата и дистрибуцијата во Хрватска на најновото филмско остварување на Тамара Котевска, „Приказната за Силјан“.

Ни претставува вистинско задоволство што македонскиот КИЦ годината ја започна со кино-премиерата во Хрватска на македонскиот документарен филм, „Приказната за Силјан“ на Тамара Котевска, која на сите ни е позната по нејзиното претходно филмско остварување „Медена земја“, за кое беше номинирана за најпрестижната филмска награда – Оскар, велат од Македонскиот КИЦ во Загреб.

Изразуваме благодарност за поканата од страна на хрватскиот дистрибутер #Рестарт и #VolimDokumentarce, македонскиот КИЦ во Загреб да биде еден од партнерите на кино-премиерата и дистрибуцијата во Хрватска на „Приказната за Силјан“ кој што својата премиера ја имаше на престижниот Меѓународен филмски фестивал во Венеција и е добитник на повеќе награди на меѓународни фестивали.

Македонскиот КИЦ во Загреб преку вакви соработки, не само што ги шири хоризонтите на регионалната културна сцена, туку доследно и достоинствено ја презентира македонската култура, филм и авторство надвор од националните граници, градејќи мостови на разбирање, дијалог и културна размена, во насока на промоција на македонските и хрватските културни вредности