Македонски
Изложба на колажи на словенската уметница Тина Дрчар ќе се отвори денеска во 19,00 часот Галерија МКЦ, петок 17 октомври • Траење: до 3 ноември.
Изложбата е спонзорирана од Министерството за култура на Словенија и остварена во соработка со МКЦ.
Како автор и креативна ко-креаторка со критичка мисла и оригинален уметнички пристап, го одсликувам мојот одговорен став кон слободата и природата. Со моите дела го привлекувам вниманието кон перверзиите на нашето заробеништво и недостижноста на моментот на избор што го одредува нашиот сетилен хоризонт.
Насловот на циклусот колажи „ИГРИ БЕЗ ГРАНИЦИ“ е метафора или парадокс на реалноста на секојдневниот живот. „КОЛАЖИ-ОМАЖИ“ се преплетување на постоечки уметнички дела и трансформација на телото на авторот преку фотографскиот објектив на Илија Терах, Андреј Лупинц, Никола Упевче, Тина Дрчар и Чрт Пикси, кои ја портретираа.
Во техниката колаж, со почит кон етаблираните уметници и нивните уметнички дела: Миле Корубин, Вемура Шоен, Ирвин Густав Вигеланд, Борис Калин, Анри Русо, Антонио Моро и Хиеронимус Бош. Во низата трансформации на телото и костумот, интервенирам во различните значења на приказните од уметничките дела со мое сопствено реинтерпретирање. Истражувам, преку себе, од искуствата и спознанието до конфликт со светот, вели Дрчар.
Тина Дрчар (1977) е сликарка и концептуална уметница, самовработена во областа на културата. Во 2004 година дипломирала на Колеџот за уметност и сликарство „Art House“ во Љубљана, под менторство на професорите Марко Бутина и Тања Мастнак. Веќе за време на студиите започнува со уметнички интервенции во Метелкова, во сликарско дуо со Бине Скрт, при што најзабележителна е нивната слика на „Мала Шола“, која претставувала и дипломска работа. Во тој период добива простор таму, кој го уредува во атеље, каде што и денес твори. Нејзините дела често се изложувани и препознатливи на ѕидните слики (мурали) во Метелково место.
Покрај сликарството, таа се изразува преку различни медиуми и уметнички техники: изработува мозаици, постери, маски, објекти и светлосни инсталации, слика сценографии за театар, а делува и како менторка на ликовни работилници. Активно учествувала во бројни изложбени проекти на уметниците од Метелкова, а имала и повеќе групни и самостојни изложби во Словенија и во странство. За своето творештво има добиено неколку награди и признанија, меѓу кои и последното – Признание на Меѓународниот фестивал на ликовни уметности во Крањ 2022, за нејзината концептуална просторна инсталација на отворено, во урбаниот простор на градот.
Уметницата Тина Дрчар е исклучително плодна, истражувачка, бунтовна и непокорна уметница, која активно го вградува своето богато знаење и искуство во творештвото, комбинирајќи наивни мотиви – кои ги надминува преку своето стручно познавање на уметничките правила – со авангардни тенденции. Нејзините уметнички интервенции се одраз на социо-политичките проблеми на младите и тензии во општеството во целина, а во исто време ги следат фасцинациите на едно време што ги преиспита традиционалните уметнички конвенции и темелно го измени современиот визуелен свет.
Таа е работохоличарка, бунтовник и иноваторка, која својот фантастичен уметнички сензибилен свет го претставува во јавниот простор, на големи формати и фасади на згради. Наративното миметичко сликарство и приказните што ги следиме во нејзините дела се раскажани од средината во која живее, со која се спојува и делумно флертува со нео-сюрреализам и експресивно фигуративно сликарство. Овие приказни, исто така, претставуваат дел од постконцептуалистичките уметнички практики, преку кои критичарите можат да развијат платформа за дискусија и концептуализација на различни теми во уметноста, културата и политиката.
Обемното творештво досега укажува на потреба од подетална анализа на делото на Тина Дрчар, кое интуитивно го чувствува и предвидува доаѓањето на нова уметничка ера, како и отпорот кон неправдата и глобалниот капитализам. Како што самата авторка се преиспитува себеси, така би било неопходно нејзината уметност да се преиспита преку дискурс и теоретски експлицитна политичка агенда, бидејќи сликарката внимателно го проучува и истражува развојот на современите трансфеминистички, трансмигрантски и квир позиции, како и феномените на ксенофобија и неразбирање на различноста.
Олга Бутинар Чех, дипломиран професор по историја на уметност и кустос на ЗДСЛУ.
