Македонски
Меѓу активистите на хуманитарната флотила, која вчера беше пресретната од израелската војска на пат кон Газа, е и студентот од Србија, Огњен Марковиќ, потврдија неговите колеги од Факултетот за драмски уметности, објави Nova.rs.
„Израелските сили штотуку ја презедоа контролата врз бродот Адара, еден од бродовите во флотилата Сумуд што носеше хуманитарна помош за Газа. Нашиот колега Огњен Марковиќ исто така беше на овој брод“, објавија студентите на социјалните мрежи.
Тие споделија и видео порака што Марковиќ ја сними пред пресретнувањето.
„Се викам Огњен и доаѓам од Србија. Ако го гледате ова видео, мојот брод беше пресретнат и нелегално сум приведен од израелските окупаторски сили“, започна Марковиќ. Во пораката, тој повика на притисок врз српската влада.
„Ве повикувам да извршите притисок врз српската влада да бара мое итно и достоинствено ослободување и да го прекине своето соучество во геноцидот“, рече тој.
