Македонски
Петар Поп-АрсовВо време на политички турбуленции, недоверба и скепса, извонредно е да се види настан којшто ја носи суштината на одговорното владеење – отчет пред граѓаните. Токму таков беше настанот кој беше замислен и организиран како Саем – Отчет на градоначалниците кои доаѓаат од редовите на ВМРО-ДПМНЕ, под мотото „4 години работа за тебе“. Тоа беше несекојдневен настан, поточно кажано, серија на настани во форма на политички саем, на кој се презентираа остварувањата кои имаат непосредна допирна точка со животот и функционирањето на граѓаните на локално ниво. Тоа беше настан кој се случува за прв пат во Македонија, нешто кое што претставува вистинска иновација за македонската политичка сцена.
„Ни требаат градоначалници кои исполнуваат, а не политичари кои ветуваат.“ Ова е главната и најсилната порака која беше испратена од отчетот на градоначалниците на најголемиот дел од македонските општини. Политичкиот курс за номинирање на кандидати и актуелни градоначалници кои исполнуваат, пресликан во духот на отчетноста која можеше да се види на споменатиот настан, уште еднаш ја потврдија определбата за транспарентно и одговорно раководење. Саемот, како политичка иновација, ја продолжи траекторијата на движење на актуелната владејачка структура за ставање на јавниот интерес пред сѐ и над сѐ. Ако пред само месец или два пишувавме на темата поврзана со отчетот за сработеното во првата година од работењето на актуелната влада, саемот на општините претставува континуитет во наметнувањето на нови навики и вредности во политичката култура кои што почнуваат да се практикуваат во Македонија.
Тоа е нешто сосема спротивно од она што можевме да го гледаме и живееме во периодот на владеењето на претходната власт, предводена од СДСМ и ДУИ. За жал, мора да го посочиме овој факт. Мора да потсетиме дека македонските граѓани воопшто не беа удостоени со отчет од страна на тогашната централна власт, ниту пак некогаш со отчет од страна на градоначалниците кои доаѓаат од редовите на овие две партии.
Тоа го гледаме и денес. Во моменти кога сѐ уште постојат општини раководени од СДСМ и ДУИ, општини и општински раководства кои можеби требаа првите да излезат со ваков тип на комуникација со граѓаните и јавноста во функција на нивната политичка рехабилитација, од таму ги гледаме само новите кандидати без никаква индикација за тоа каде се нивните досегашни градоначалници и што сработале за време на нивните мандати?!
Во интерес на СДСМ и ДУИ е да ја прифатат праксата која што веќе ја воспоставува ВМРО-ДПМНЕ и конечно да почнат со транспарентен однос и комуникација со македонските граѓани, не само во моментите кога ја бараат нивната доверба и глас, туку и во моментите кога треба да се поднесе сметката. Отсуството на транспарентност и отчетност, во современиот политички момент, претставуваат сериозен хендикеп за секоја политичка партија која има повеќедецениски континуитет на македонската политичка сцена. Ова особено важи за СДСМ и ДУИ.
Да се вратиме на саемот.
Саемот не беше само класичен политички собир, туку настан и платформа преку која беа пласирани конкретни идеи, дела и визија за локалниот развој. Секоја општина беше соодветно застапена, секој градоначалник имаше простор да го каже она за кое што смета дека е од најголема важност, а присутните граѓани беа во можност лично и директно да слушнат што е постигнато, на што се работи и што е она што следува.
Одговорноста како политичка култура,е суштински столб на демократијата. Без отчетност, политиката е празна форма без содржинска компонента. Со отчет, политиката се претвора во услуга на граѓаните, кое што всушност претставува една од нејзините основни појдовни точки и претпоставки. Настанот ја испрати токму таа порака, дека градоначалниците имаат чувство на одговорност и подготвеност да ги презентираат постигнатите резултатите, секако, доколку имаат постигнати резултати.
И пак течението на текстот не води кон дигресија и поставување на едно неизбежно прашање. Значи ли тоа дека отсуството на отчет кај градоначалниците на СДСМ и ДУИ, воедно претставува и отсуство на резултати и реализирани проекти или тоа е само едно „бенигно“ игнорирање и непочитување на јавноста и граѓаните?!
Настанот не беше само класичен собир на претставниците на локалната самоуправа, туку тој ја демонстрираше симбиозата на централната со локалната власт која се покажа како најуспешната формула за успешно и непопречувано реализирање на проектите. Тука беше демонстрирана решеноста на владата и премиерот Мицкоски за подршка на сите издржани проекти кои се од интерес на граѓаните на локално ниво.
Со тоа беше потврден клучниот пристап на партијата ВМРО-ДПМНЕ, односно, да не се зборува само за ветувања и заложби, туку да се тежнее зборовите да бидат оправдани и потврдени со резултати.
На саемот можеше да се слушне лидерски глас и визија. Мицкоски јасно посочи дека оваа влада во нејзината прва година и некој месец од функционирањето се поставила како вистински партнер на локалната власт, а не само како централна власт која е сместена некаде на врвот над облаците.
Тоа кристално и чисто говори за формулата која претставува и ќе претставува успех за развојот на секоја општина во Македонија, соработката на централната со локалната власт. Токму ова беше духот што ги соедини на сцената градоначалници и министрите кои заедно демонстрираа подготвеност за отворени врати при што на прво место секогаш се става потребата на граѓаните.
Работењето во текот на мандатот од четири години се темел и препорака за следните четири. Довербата која што ќе ја бараат актуелните градоначалници или пак новите кандидати не може да се заснова само на обични ветувања за иднината, туку истата мора да се потпира на кредибилна основа на нешта кои што се веќе сработени и реализирани, лично или од претходниците од истата партија. Ако првите четири години се период на реконструкција и враќање на довербата, следните треба да бидат период на раст и развој.
Токму затоа, саемот не беше само презентација на минатото, туку и визија за иднината. Македонија заслужува политика на дела, не на празни зборови. Токму тоа е уште една од пораките од овој саем, дека работата, транспарентноста и отчетноста се единствениот пат кон подобра иднина. На македонските граѓани веќе не им требаат градоначалници кои само ветуваат, туку им требаат луѓе кои исполнуваат.
