Македонски
Претседателката Гордана Сиљановска-Давкова го прими шефот на Делегацијата на Европската Унија амбасадорот Михалис Рокас, кој ѝ го предаде Извештајот на Европската комисија за напредокот за 2026 година. Како што соопштуваат од Кабинетот на претседателката, тие се согласиле дека се постигнати очигледни конкретни резултати.
Обајцата го поздравија препознавањето на државата како една од најуспешните во исполнувањето на Реформската агенда и Планот за раст на Западен Балкан. Амбасадорот Рокас укажа на идентификуваните слабости и на потребата од засилени реформи во владеењето на правото, правосудството и борбата против корупцијата – се вели во соопштението.
Според Сиљановска-Давкова, зголеменото ниво на подготвеност во поглавјата 10 (Дигитална трансформација и медиуми) и 26 (Образование и културa), како и регистрираниот напредок во науката и истражувањето и заедничката надворешна, безбедносна и одбранбена политика, сведочат за манифестиран и докажан институционален капацитет на државата во исполнувањето на европските стандарди.
Претседателката изразила очекување дека финализирањето на патоказите за владеење на правото и реформата на јавната администрација, како и на Акцискиот план за заштита на малцинствата, ќе донесат видливи промени и напредок во Кластерот „Основи “.
Во рамките на своите уставни надлежности, Сиљановска-Давкова истакнала дека ќе продолжи да се однесува реформаторски, придонесувајќи за јакнењето на демократијата.
Претседателката потсети дека извештајот треба објективно да го прикажува реализирањето на Копенхашките критериуми, а не на наметнатите билатерални политички услови, спротивни на европските вредности и принципи утврдени во европските уставни акти. За неа, нашето изоставување од групата на земји предводнички во процесот на проширувањето, не ја отсликува реалноста и испраќа негативни сигнали до македонската јавност – наведуваат од Кабинетот.
Оттаму додаваат дека Сиљановска-Давкова уште еднаш повикала на еднаков третман на сите земји-кандидатки во пристапниот процес. Според неа, потребни се политичка волја и поактивен ангажман на европските институции и земјите-членки за деблокада на македонскиот пат кон ЕУ.
