Македонски
На 23 септември 1903 година, високо на падините на Баба Планина, над селото Цапари, се одиграла една од најтрагичните и последни големи пресметки на Илинденското востание – Пелистерската битка.
Во месноста денес позната како Палиснопје, 92 востаници се нашле опколени од османлиски аскер. Од нив, 48 загинале.
По задушувањето на Илинденското востание, четите предводени од војводите Ацко Трајков од Базерник, заедно со востаници од Демирхисарско и Битолско, требало да го предадат оружјето за да биде скриено и сочувано. Но, тие биле предадени.
Османлиските сили ги опколиле во близина на Цапари.
Пред востаниците стоела тешка одлука. Доколку останеле во непосредна близина на селото, постоела опасност Цапари да ја доживее судбината на други населени места кои претходно биле запалени.
Затоа војводата Ацко Трајков наредил повлекување кон високите делови на Пелистер. Следувала жестока битка.
Опколени од многубројниот аскер, востаниците се обиделе да го пробијат обрачот и да се извлечат кон планината. Цената била огромна.
Од вкупно 92 востаници, 48 го загубиле животот на падините на Пелистер. Останатите, некако успеале да го пробијат обрачот и да се повлечат кон повисоките делови на планината.
Пелистерската битка се смета за последната битка од Илинденското востание во 1903 година и претставува еден од најтрагичните завршни настани од востаничката епопеја.
Во спомен на загинатите, во 1968 година, во близина на Ротинска Река, на патот кон врвот Пелистер, било подигнато скромно спомен-обележје.
Преземено од фејзбук: Македонија денес
