Македонски
Во некои европски градови, присуството на само едно лице во автомобилот веќе не е само прашање поврзано со сообраќајниот метеж. Специјалните ленти наменети за возила со повеќе патници сè почесто се надгледуваат со камери способни да го детектираат бројот на лица во возилото, а возачите кои не ги почитуваат правилата се соочуваат со казни.
Во нашето поблиско соседство, оваа практика постои и во Босна и Херцеговина, иако не се следи и казнува на истиот начин како што неодамна беше воведено во Шпанија. Имено, сообраќајните власти во Шпанија дополнително го развиваат системот за надзор на таканаречените ВАО или ХОВ ленти (VAO / HOV – ленти за возила со висока исполнетост), наменети за возила што превезуваат повеќе патници. Овие ленти се означени со посебни сообраќајни знаци, а на одредени делници, користењето на лентата бара во возилото да има најмалку две лица.
Сепак, правилата варираат во зависност од автопатот, па возачите мора да внимаваат на сигнализацијата и на специфичните услови на секоја поединечна делница.
Особено интересен аспект на новиот систем е автоматизираното спроведување на прописите. Камерите можат да ја комбинираат технологијата за препознавање регистарски таблички со детекција на патници, овозможувајќи санкционирање без запирање на возилото. Во Шпанија, казната за неовластено користење таква лента може да изнесува 200 евра.
Сепак, Шпанија не е единствената европска земја што го воведува овој начин на спроведување на прописите. Франција веќе почна да ги казнува возачите кои ги користат специјалните ленти за заедничко патување додека возат сами. Од 3 март 2025 година, на дел од обиколницата „Булевар Периферик“ во Париз функционира посебна лента наменета за возила со најмалку две лица, како и за јавен превоз, такси-возила и одредени други категории возила. Лентата е активна во работните денови, за време на утринскиот и попладневниот шпиц. Казната за прекршување на ова правило изнесува 135 евра.
За спроведување на правилото, и француските власти воведоа систем за видео-надзор којшто користи камери за броење на лицата во возилото – вклучувајќи ги и оние на предните и задните седишта, и за читање на регистарските таблички. Системот прво регистрира потенцијален прекршок, по што овластено лице го разгледува случајот пред да се изрече казна.
И Шпанија и Франција ги оправдуваат овие мерки првенствено со потребата да се намалат сообраќајниот метеж, бројот на автомобили и испуштањето штетни гасови, особено во големите градови. Затоа, пораката до возачите е сосема едноставна: Нема проблем ако сте сами во автомобилот – проблемот настанува ако возите сами, а се вклучите во лента наменета за возила со повеќе патници. Целта е да се намали бројот на автомобили на патиштата преку поттикнување повеќе луѓе да патуваат во едно возило.(МИА)
