Замина еден од најголемите тренери во историјата на НБА – почина Дон Нелсон

Легендарниот американски кошаркар и тренер Дон Нелсон почина на 86-годишна возраст, потврди неговото семејство.

Нелсон е едно од најголемите имиња во историјата на НБА. Како играч освои пет шампионски титули со Бостон Селтикс, а уште поголема трага остави како тренер, предводејќи ги Милвоки Бакс, Голден Стејт Вориорс, Њујорк Никс и Далас Маверикс.

Во текот на својата тренерска кариера запиша 1.335 победи, што долго време беше рекорд во НБА. Три пати беше прогласен за тренер на годината, а во 2012 година беше примен во Куќата на славните на кошарката.

Нелсон остана запаметен како еден од најиновативните тренери во историјата на лигата. Неговиот препознатлив стил на игра, познат како „Nellie Ball“, се темелеше на брз напад, шут за три поени и игра со пониски постави, концепти кои подоцна станаа составен дел од модерната кошарка.

Зад себе остави неизбришлива трага во НБА и генерации кошаркари и тренери кои беа инспирирани од неговата филозофија на игра.