Македонски
Чешкиот премиер Андреј Бабиш му изрази поддршка на унгарскиот премиер Виктор Орбан во пресрет на парламентарните избори во Унгарија, оценувајќи дека Орбан „секогаш ги бранел унгарските граѓани и националните интереси“, како и дека се залагал за Европа заснована на мир, суверени нации и на конкурентност.
„Го поддржувам Виктор Орбан во недела. Тој отсекогаш се борел за посилна Европа, Европа изградена врз мир, суверени нации, суверени земји-членки, конкурентност“, напиша денеска Бабиш на платформата Икс..
„Во турбулентни времиња, изборот на стабилност и докажано лидерство е поважен од кога било“, додаде шефот на чешката влада.
Бабиш, кој по потекло е од Словачка, од средината на декември владее со Чешка во коалиција со две помали партии од десниот политички спектар. Двајцата лидери со своите партии во Европскиот парламент ѝ припаѓаат на крајно десничарската група „Патриоти за Европа“ (PfE).
Унгарскиот премиер во Европа често е критикуван дека за време на своето владеење систематски ги нарушувал демократските институции, норми и процеси, како и владеењето на правото.
