Пријавени 70.185 лица за вакцинација против грип, досега вакцинирани 6.282 лица од ризичните групи

Од активирањето на апликацијата „vakcinacija.mk“ за бесплатна вакцинација против сезонски грип, досега се пријавени 70.185 лица, информираат за МИА од Министерството за здравство.

Досега се вакцинирани 6.282 лица од ризичните групи население. Вакцинацијата се одвива на 31 пункт низ државата, од кои пет пункта се во Скопје, во поликлиниките Идадија, Битпазар и Ѓорче Петров, во Центарот за јавно здравје-Скопје и Институтот за јавно здравје.  

Бесплатната вакцинација против сезонски грип е наменета за лица над 65 години, лица со хронични заболувања, здравствени работници, бремени жени, како и деца на возраст од шест месеци до пет години, наведуваат од Министерството.