Македонски
Во организација на Слоу Фуд „Лихнидос“ од Охрид утревечер на плоштадот „Долна Порта“ ќе се одржи Четвртото издание на манифестацијата „Вкусете го Охрид локално“.
Како и изминатите изданија, и овојпат сите оние што од 19 часот ќе дојдат на манифестацијата ќе имаат можност да уживаат во дегустација на локални специјалитети и вина, промоција на домашни производи и занаетчиски изработки, демонстрации на традиционални занаети, сето збогатено со културно-уметничка програма со настапи на фолклорни ансамбли и наградна игра со локални производи.
Организаторите уверуваат дека настанот ќе понуди незаборавно доживување под отворено небо, посветено на промоција на локални производи, традиционална гастрономија, занаетчиски вештини и културното наследство на Охридскиот регион.
Манифестацијата е поддржана од Општина Охрид и Министерството за земјоделство, шумарство и водостопанство и има за цел да ги зајакне локалната економија, автентичната гастрономија и женското претприемништво.
