Македонски
Неутралниот статус на Украина останува една од целите на Русија, изјави синоќа претседателот на Русија, Владимир Путин, на пленарната седница на XXIII годишно заседание на Меѓународниот дискусионен клуб „Валдај“.
Одговарајќи на прашање дали неутралниот статус на Украина и понатаму останува меѓу целите на Русија, Путин одговори потврдно.
– Да. Затоа што Украина, стекнувајќи независност, усвои декларација. Сакам да ве потсетам на тоа. Врз основа на таа декларација таа доби независност. Во декларацијата пишува дека таа е неутрална држава – рече Путин.
Според него, потребно е да се престане со обвинувањата дека Русија не сака преговори и да се земат предвид „реалностите што се формираат на теренот“.
– Потребно е само да се престане со обвинување на Русија дека не ги сака тие преговори и, поаѓајќи од реалностите што се формираат на теренот, да се донесуваат одговорни одлуки, како од самата Украина, така и од спонзорите на Западот – пред сè денес во Европа – рече Путин.
Тој нагласи дека Русија во моментов не гледа подготвеност од украинска страна за прекин на борбените дејствија.
– Подготвени сме да ги почнеме тие преговори и да ги завршиме што е можно побрзо, но, секако, под услови што се прифатливи и за Руската Федерација и за нашиот народ. Но, се чини, едноставно нема желба од таа страна да се запрат борбените дејствија – рече тој.
Говорејќи за можната содржина на идниот договор, Путин рече дека, доколку Украина и нејзините западни партнери ги прифатат условите прифатливи за Русија, би било подобро да се прекинат борбите и да се постигнат договори и во хуманитарната сфера.
– Ако тие се согласат со условите што се прифатливи и за Русија, тогаш веројатно е подобро да се прекинат овие тешки случувања, да се избегнат дополнителни загуби од двете страни и да се постигнат договори и во хуманитарната сфера, која се однесува и на рускиот јазик и на други прашања – рече Путин.
Тој нагласи дека, според ставот на Москва, прашањето за териториите не е единствениот, ниту пак клучниот елемент на конфликтот.
– Не е работата во тоа парче територија. Работата е во луѓето. Потребно е да создадеме услови не за примирје, туку за долготраен мир, за долга историска перспектива – рече Путин.
Тој наведе дека во август минатата година, за време на разговорот со претседателот на САД, Доналд Трамп, во Енкориџ на Аљаска, Москва прифатила одредени предлози од Соединетите Американски Држави во врска со Украина.
– Во Енкориџ ни беа изнесени одредени предлози. Реков: „Треба да се размисли“, а во Енкориџ дојдов и реков дека сме согласни со предлозите на САД. Не разговаравме во Енкориџ за нашите предлози, туку за предлозите на Соединетите Држави, и јас дојдов да кажам дека сме согласни – објасни рускиот претседател.
Говорејќи за безбедносните гаранции, Путин рече дека тие им се потребни не само на Украина, туку и на Русија.
– И нам ни се потребни безбедносни гаранции, не само на таа страна, со што сме согласни. Има многу предлози, вклучително и оние што ги изнесе претседателот Трамп. Тоа се сложени одлуки за нас, но генерално разбираме дека тоа е движење во вистинската насока – додаде Путин.
Рускиот претседател рече дека руските сили, според проценките на Москва, би можеле значително порано да ја преземат контролата врз преостанатиот дел од територијата на самопрогласената Доњецка Народна Република отколку што проценуваат украинските и европските власти.
– Ние сметаме дека тоа ќе се случи многу порано, имајќи го предвид темпото на напредување на нашите трупи – рече Путин.
Според него, Русија во текот на септември ставила под контрола 1.301 квадратен километар територија во зоната на борбените дејствија.
Путин исто така рече дека Русија била подготвена за продолжување на преговорите со Украина уште на 21 септември, но го обвини Киев дека во пресрет на изборите во Русија се обидел да изврши напади врз руска територија.
– Ние уште на 21 септември бевме подготвени да го почнеме преговарачкиот процес. И што направија тие? Самите не одржуваат избори, а се обидоа кај нас да ги попречат. Од 19 до 20 септември се обидоа да ја пробијат противвоздушната одбрана на Москва, лансираа повеќе од 1.600 дронови кон Москва, а без престан ги напаѓаа избирачките места во другите региони на Руската Федерација – рече Путин.
Тој наведе дека за време на изборната кампања и нападите врз избирачките места загинале шест членови на изборните комисии.
Путин порача дека Русија не води политика на освојување територии.
– Ние никого не напаѓаме и ништо од никого не одземаме – рече рускиот претседател.
Говорејќи за односите меѓу Русија и Западот, Путин оцени дека дел од европските земји сакаат да ја ослабат Русија.
– Многумина во Европа сакаат да ја докрајчат Руската Империја, која одамна ја нема, но тие, изгледа, не се свесни за тоа – рече Путин.
Пленарната седница на XXIII годишно заседание на Меѓународниот дискусионен клуб „Валдај“ се одржа во Москва, во Националниот центар „Русија“. Обраќањето на Путин и разговорот со учесниците траеја околу три и пол часа
