Македонски
Генералниот секретар на ОН, Антонио Гутереш порача дека светот не треба да се чувствува заплашен од израелските закани за одмазда за признавање на палестинска државност или политиките што ги поддржуваат Палестинците.
Израелската влада постојано напредува со мерки за целосно уништување на Појасот Газа и спроведување на подмолната анексија на Западниот Брег, изјави Гутереш.
Со признавањето на палестинска држава, планирано за понеделник на самитот на ОН од страна на Франција и неколку други земји, израелските претставници отворено му се заканија на Париз со дипломатски мерки, како и со анексија на Западниот Брег, кој Израел го окупира од 1967 година.
Но, за Гутереш, каков и да е „изговорот“ што Израел го користи за своите политики на палестинските територии или против земјите што покажуваат поддршка за палестинска држава, тоа всушност е „постојана, чекор-по-чекор акција на владата на Израел за да ги спречи Палестинците да имаат држава“.
Затоа не смееме да се чувствуваме заплашени од ризикот од одмазда, бидејќи без разлика што правиме, овие акции ќе продолжат. Мислам дека е важно тие (Израел) да се чувствуваат сè поизолирани за да се променат“, додаде генералниот секретар на ОН, цврст поддржувач на решението со две држави и за Израел и за Палестина.
Тој ја опиша перспективата за понатамошно признавање на Палестина како „исклучително важен симбол за палестинскиот народ“.
Гутереш повика на прекин на огнот во Појасот Газа.
Она што го гледаме во Газа е ужасно. Ова е најлошото ниво на смрт и уништување што сум го видел откако станав генерален секретар, веројатно во целиот мој живот. Цврсто верувам дека ова е морално, политички и правно неприфатливо“, рече Гутереш, одбивајќи да го употреби зборот „геноцид“ во отсуство на судска одлука за ова прашање.
