Македонски
Американскиот претседател Доналд Трамп изјави дека до крајот на неделата е можна негова средба со неговиот кинески колега Си Џинпинг, јавија британските медиуми.
Трамп изјавата ја даде откако беше постигнат напредок во преговорите меѓу двете најголеми економии во светот за прашањето за склучување нов трговски договор – што во моментов е тема на нивно меѓусебно надмудрување и ривалство.
Разговорите за време на викендот во Женева доведоа до „ресетирање“ на односите меѓу САД и Кина, објави американскиот претседател.
Во заедничката изјава објавена по состанокот се наведува дека Вашингтон и Пекинг го одложуваат стапувањето во сила на некои од воведените царини за 90 дена.
Берзите реагираа позитивно на веста, а главните индекси на Волстрит денеска нагло пораснаа во раното тргување.
Трамп изрази оптимизам дека во следните 90 дена ќе се постигне договорот и дека царините за кинески увоз нема повторно да се зголемат на 145 отсто по истекот на тој период.
