Македонски
На локацијата „Школка“ во Градскиот парк денеска во 18 часот почнува 15. издание на фестивалот „Виноскоп 2026“, кој се организира под покровителство на Град Скопје.
Фестивалот ќе трае до 17 мај и ќе понуди богата програма за сите љубители на виното, музиката и урбаното дружење. Посетителите ќе имаат можност да дегустираат различни видови вина од бројни македонски винарии и производители на квалитетно македонско вино, претставени на фестивалските штандови. Покрај винската понуда, фестивалот ќе понуди и разновидна гастрономска содржина, како и музичко-забавна програма со настапи на домашни музички изведувачи, бендови и диџеи, информираат од Град Скопје.
Програмата на фестивалот утре ќе почне во 18 часот, во петок во 17 часот, додека за време на викендот во 12 часот.
Годинава, „Виноскоп 2026“ носи и тематски музички вечери, како и специјална дневна програма под концептот „Блуз и вино“, наменета за сите љубители на автентичниот звук, добрата атмосфера и квалитетното вино, посочуваат од Град Скопје и додаваат дека преку организацијата на „Виноскоп“, продолжуваат со поддршката и промоцијата на македонските производители на вино, винската традиција и потенцијалот на земјата за развој на винскиот туризам.
