Македонски
Владата продолжува да бара решенија за проблемот со ограничувањето на престојот на македонските професионални возачи во Шенген-зоната преку склучување билатерални договори со земјите членки, истакна вицепремиерот и министер за транспорт Александар Николоски.
Тој посочи дека државата веќе има постигнато договори со дел од земјите, а во следниот период ќе продолжат разговорите со други држави со цел да се обезбеди поголема покриеност на рутите по кои најчесто се движат македонските транспортери.
„Имаме целосно разбирање за транспортерите и се обидуваме во рамки на нашите можности да помогнеме и да изнајдеме решенија. Се работи за правила во Шенген-зоната, а она што ние можеме да го направиме е да потпишуваме билатерални договори со земјите членки“, рече Николоски.
Според него, договори веќе има со Швајцарија, Хрватска и Романија, додека во тек се активности за постигнување договори и со други земји.
Во текот на септември е предвидена средба на високо ниво со австриската влада, а во октомври со словенечката. Паралелно, Министерството за транспорт работи и на разговори со Германија.
Николоски нагласи дека целта е со билатералните договори да се опфатат државите низ кои минуваат најголем број македонски транспортни компании и нивните возачи.
Тој додаде дека Владата и Министерството за транспорт ќе продолжат со активностите за изнаоѓање дополнителни решенија за професионалните возачи, кои се соочуваат со ограничувањата поврзани со правилото 90/180 дена.
