Македонски
Поранешниот прв вицепремиер Артан Груби, второобвинет во случајот „Државна лотарија“, на 13 октомври по сила на закон излегува од куќен притвор. Сепак, мерката со која привремено му е одземен пасошот и му е забрането издавање нова патна исправа ќе продолжи да важи.
Одбраната на Груби побарала да биде укината и оваа мерка, нудејќи гаранција во недвижен имот во вредност од 335.707 евра дека обвинетиот нема повторно да избега и дека ќе им биде достапен на правосудните органи додека трае судската постапка.
Од Основниот кривичен суд Скопје за „360 степени“ појасниле дека обвинителниот предлог против Груби и уште седуммина обвинети бил поднесен на 13 август. Бидејќи станува збор за обвинителен предлог, а не за обвинителен акт, согласно членот 470 од Законот за кривичната постапка, притворот може да трае најдолго 60 дена од денот на поднесувањето.
Оттука, мерката куќен притвор за Груби истекува на 13 октомври 2026 година и не може да биде продолжена.
– По сила на Законот, мерката куќен притвор за овој обвинет истекува на 13 октомври 2026 година. Воедно, покрај мерката куќен притвор, против обвинетиот е определена и дополнителна мерка на претпазливост, односно привремено одземање на патната исправа и забрана за издавање патна или друга исправа за преминување на државната граница, која ќе продолжи да важи и по истекот на законски предвидените 60 дена – информираат од Кривичниот суд.
За понудената гаранција е оформен посебен предмет, кој е доставен на мислење до надлежното јавно обвинителство. По добивањето на мислењето, Кривичниот совет треба да одлучи дали ќе го прифати предлогот на одбраната и ќе му го врати пасошот на Груби.
– По понудената гаранција е оформен предмет, кој е доставен на мислење до надлежното јавно обвинителство. По добивањето на мислењето, Кривичниот совет ќе постапува по предлогот, а за донесената одлука странките и јавноста ќе бидат навремено известени – соопштија од Судот.
Обвинение за штета од 9,7 милиони евра
Во случајот „Државна лотарија“, покрај Груби, обвинети се и поранешниот директор на „Државна лотарија“ Перпарим Бајрами, поранешниот генерален секретар на Владата Методија Димовски, како и поранешните членови на Надзорниот одбор Скендер Мехмети, Бојан Јанев, Фатмир Рамадановски, Александар Димитриоски и Башким Авди.
Тие се товарат за злоупотреба на службената положба и овластување во врска со набавката на видеолотариски терминали за приредување електронски игри на среќа.
Според обвинителниот предлог, обвинетите во текот на 2023 и 2024 година ги пречекориле границите на своите службени овластувања и овозможиле набавка на терминалите, иако знаеле дека АД „Државна лотарија“ нема право самостојно да приредува електронски игри на среќа. Обвинителството тврди дека со нивните постапки била предизвикана штета од 9,7 милиони евра.
Груби се товари дека како тогашен прв вицепремиер претседавал со владина седница и предложил усвојување точка за која, според Обвинителството, бил свесен дека не е во надлежност на Владата. По донесената одлука, „Државна лотарија“ добила одобрение да набави видеолотариски терминали и самостојно да приредува игри на среќа.
Груби и Перпарим Бајрами ја напуштија државата пред Обвинителството официјално да ја отвори истрагата во декември 2024 година. Груби се врати во земјава на 23 февруари 2026 година преку граничниот премин „Блаце“, по што беше приведен и спроведен во затворот „Скопје“ во Шуто Оризари. Таму се задржа само неколку часа, бидејќи Обвинителството предложи, а судот прифати, затворскиот притвор да му биде заменет со куќен.
Како образложение беше наведена безбедносна процена на Министерството за внатрешни работи и Агенцијата за национална безбедност дека во притворското одделение во „Шутка“ не може да му се гарантира безбедноста.
Првообвинетиот Перпарим Бајрами, по кого исто така беше распишана меѓународна потерница, се врати во земјава на 9 септември и беше спроведен во притвор.
