Македонски
Драмски театар во сабота (19 септември) премиерно на сцената ќе ја изведе диптихот „Федра – Антропологија на една желба“, во режија на Дино Мустафиќ.
Диптихот ги спојува „Федра“ на Жан Расин и „Љубовта на Федра“ на Сара Кејн во една театарска вечер и ги соочува двете епохи, двете драматургии и двата радикално различни сценски света со истата човечка пукнатина: моментот кога желбата ја надвладува моќта на разумот.
Во центарот на двете претстави е првенката на Драмски театар Скопје, Јелена Жугиќ, која ја толкува Федра како современа жена, истовремено „грешник и жртва“, и како лик кој станува субверзивен во општество што се плаши од емоцијата.
Во „Федра“ на Жан Расин, во улогата на Тезеј настапува првенецот на Драмски театар Скопје, Дејан Лилиќ, додека во „Љубовта на Федра“ Тезеј го толкува Александар Степанулески. Двата Хиполита, Лазар Христов и Леонардо Лазов, отвораат две различни актерски перспективи кон бунтот, забранетото, моќта и светот во кој нивните ликови се обидуваат да опстанат.
Актерската екипа на диптихот ја сочинуваат и Ивана Павлаковиќ, Нина Елзесер, Златко Митрески, Јована Спасиќ, Трајанка Илиева-Вељиќ, Ања Митиќ, Дениз Абдула, Томислав Давидовски, Марјан Наумов и Гордана Ендровска.
Креативната екипа ја сочинуваат: Дино Мустафиќ – режија, Димче Николовски – асистент на режисерот, Драгутин Броз – сценографија, Антонија Гугинска-Јорданоска – костимографија, Влатко Стефановски – музика и Филип Петковски – сценски движења. Драматурзи се Александра Бошковска за „Федра“ и Викторија Рангелова-Петровска за „Љубовта на Федра“, а фотограф е Драган Гајиќ.
