Skip to main content

Изложба во МСУ по повод 45 години постоење на Факултетот за ликовни уметности

Факултет за ликовна уметност

Факултетот за ликовни уметности – Скопје ќе одбележи 45 години од основањето со ревијална изложба „45 години ФЛУ“ која ќе биде отворена вечер од 19 часот во Музејот на современата уметност – Скопје. На изложбата ќе биде претставен избор од 45 дела на 45 автори од колекцијата на МСУ, како и дела во сопственост на уметниците – наставен кадар на ФЛУ, од неговото основање до денес.

ФЛУ информира дека изложбата е централен настан и официјална прослава на јубилејот и дека е резултат на долгогодишната заедничка соработка меѓу Факултетот за ликовни уметности и Музејот на современата уметност, „со цел да се одбележи богатото наследство и креативниот придонес на факултетот во развојот на македонската и регионалната уметничка сцена“.

Поставката симболично го прикажува континуитетот и еволуцијата на уметничките изрази што се развиваа во текот на 45-те години. Целта на изборот на дела што ќе бидат претставени е да ја отслика разновидноста на уметничките практики и правците што се развивале низ годините, нагласувајќи го нивниот континуиран дијалог со современите текови во уметноста. Преку оваа изложба, посетителите ќе имаат можност да ги согледаат промените во визуелниот јазик и концептуалните пристапи што ги обликувале уметниците поврзани со ФЛУ, но и поширокиот уметнички контекст во кој тие твореле, наведува ФЛУ.

Покрај уметничките дела, изложбата ќе биде придружена и со документарни прилози кои сведочат за историјата и активностите на факултетот, овозможувајќи подлабок увид во неговата улога како значајна институција за уметничко образование и истражување.

Овој настан претставува значајна можност за академската заедница, уметниците, студентите и љубителите на уметноста да се запознаат со богатата историја на ФЛУ, но и да дискутираат за неговата иднина во контекст на современите уметнички и образовни предизвици, соопшти Факултетот за ликовни уметности за изложбата која ќе може да се посети во наредните 45 дена.

Поврзани вести